Ya paso Purim… Purim purim lanu, Pesah en la mano; Ya vino enverano, para ir al kampo…
Ansina, komo dize esta kantika, ya vinimos al kampo, kero dizir a la kampanya. Kada anyo me se esta engrandesyendo en el ojo estas idas i vinidas. Malgrado ke ya tenemos todo en las kazas, yene es pena grande. Estos anyos dalkavo no se esta topando mujer para alimpyar las kazas ke kedan 9 mezes serradas. I si se topa, demandan presyos altos. Komo aziyamos antes?
Antes en dizyendo era el tiempo de la manseves. Komo dizen en turko: si esprimiyamos la piedra, kitavamos su agua. Anyos antes, mos ivamos a Yeşilköy por kampanya. Aya las kazas eran enteras vaziyas. Se tomava kamyon i mos yevavamos todo. Somyes, kamas, fotolyos, makina de lavar, frijider, chinis, kalderas, savanas… todo… asta el vazo de flores para meter ensima de la meza. Ama akel tiempo, las vakansas de enverano sureyavan kaji 4 mezes. Las eskolas se serravan fin de Mayo. I mozotros pishin a la kampanya. I a la fin de Septiembre se avriyan las eskolas, ya era tiempo de tornar ma kuando ya eramos mas grandes ke puediyamos ir i vinir a la eskola, mos kedavamos asta el diya de la fiesta de la republika ke es 29 Oktubre.
Despues de kazar, ampesimos a irmos a las Islas. I akel tiempo mos yevavamos kamas, makina de lavar i frijider. La makina de lavar i el frijider las inchiyamos de vidreriyas i chamashires. Teniyamos un portero (hamal) Izak. Ke fuersa ke teniya. El solo, alevantava esto todo en su espalda. Anyos despues lo vimos en el ospital Or Ahayim. Povereto estava arastando el pye. Parese ke era hazinura de su profesyon. Un anyo me akodro ke el diya ke ivamos a tornar, izo una luvya komo mabul i todo lo ke teniyamos se empapo de agua. Sureyo kaji un mez para sekar todo. Sovre todo los kavesales i las kamas no supyeron sekarsen.
La verdad ke era muncha pena ma komo vos dishe kon la manseves no mos estavamos apersivyendo. La manseves es una vez … muy djusto.
