El dia del padre es un dia emportante en la famiya. Ayuda a rekoneser el esforso ke aze un padre para sus ijos, para su famiya. Este dia es una selebrasyon ke forma parte de muestra tradisyon kultural.
Es muy emportante ke los padres partisipen a la edukasyon de sus ijos del empisijo. Esta relasyon deve de kultivarse del nasimyento en delantre.
La semana ke paso, el treser alhad del mez de junio se selebra en la Turkiya el “Dia del Padre”, una fyesta muy spesyal, para todos los padres ke tyenen kriyaturas, (ijos i ijas).
No mos olvidaremos ke las selebrasyones son syempre un grande motivo de alegriya para las famiyas.
Este dia no es solamente para los mansevos. Si uno no es padre, tambyen es emportante para los ke somos adultos.
El dia del padre mos da la oportunidad de ekspresar muestro agradesimyento a muestros papas, por todos los sakrifisyos ke izyeron por engrandesermos, seya moralmente seya materyalamente.
Mizmo si no tyenen la posibilidad de gastar, azen todo lo ke pueden para la edukasyon i otras kozas emportantes en la vida de sus kriyos.
Es un dia espesyal ke mos ayuda a akodrarmos las difikultades ke pasaron, para ke sus ijos seyan perfektos en todos los puntos de vista en la vida.
Este dia es una okazyon perfekta para enforteser la relasyon entre padre i ijo u ija, para azer una koza espesyal, unika i diferente.
Es una uzansa de selebrar este dia en la famiya, seya kon un regalo, seya kon unas palavras dulses, u simplemente azyendole kompanyiya en tenyendole su mano i mostrandole muestra afeksyon.
Siguramente ke un padre es kansado de lavorar semana entera sin tomar reflo. Por esta kavza una idea ekselente es azerle pasar un dia diferente, una fin de semana en un otel enfrente de la mar, por egzempyo.
Reunir las tres jenerasyones sera un dia inolvidavle para el, de ver su padre i su ijo allado de el.
Es una okazyon maraviyoza para pasar tyempo todos endjuntos. Siguramente ke kada uno i uno tyenen aventuras i anekdotas enteresantes para kontar i enrikeser esta unyon.
El padre ambeza todo lo ke save al ijo. El da apoyo, el da la vida i mos kayenta lo de aryento, komo la luz del sol.
Tyenen un korason yeno de amor, eyos mos ambezan a azer todo de la mijor manera, son los mas perfektos del mundo.
Oguro de selebrar kada anyo todos endjuntos kon sanedad i felisidad.
“Pujados i non aminguados”, Amen.
