UNA LIBRERIA EN BERLIN

Süzet FRANSEZ Judeo-Espanyol
22 Haziran 2022 Çarşamba

Françoise (Frymete) Frenkel nasida en Polonya en 1889, era namorada de la literatura franseza. Se fue a Paris para bushkarse un futuro interesante i para estudiar el arte. En 1921, se enkontro kon Simon Reichenst, judio ruso, se kazaron i se instalaron en Berlin. Por su amor por los livros i por la kultura franseza, avieron una libreria ke se yamava “La maison du Livre”, un sentro de valores universales onde, artistos, eksantrikes, personas famozas se reunian para diskutir. Grandes otores fransezes komo André Gide, André Maurois davan lisiones i konferensias asta la venida de Hitler al poder.

Viendo la gravidad de la situasion politika, antes un mez del empesijo de la 2da Gerra Mundial, Frenkel fue ovligada de serrar su magazen i se fuyo a Paris. Malorozamente su marido fue asasinado en el kampo de Auschwitz. En dingun lugar no se estava sintiendo en seguridad, de Paris, paso a Vichy i a Avignon i se instalo en Nisa. Devia de eskonderse para evitar la deportasion. Durante la gerra, eya se fuyo a la Suisa i ayi eskrivio un livro otobiografiko “Rien ou poser sa tete” (nada para pozar la kavesa), onde konta la epizoda de su egzistensia ke fue publikada por la primera vez en 1945 en la Suisa.

En el anyo 2010, en un merkado de Nisa, un eskritor fransez, atirado por su titolo, lo merko. En este livro “Rien ou poser sa tete”, deskuvrio el testimonio de una judia polaka, fundadora de una libreria franseza en Berlin. Kon grande entuziasmo lo estava meldando a sus amigos. La eskritora era un misterio, ma todo lo ke kontava era echos reales ke bivio en esta perioda de gerra. A la fin, kon el ayudo de Patrick Modiano, otor ke eskrivio el prologo, el editor fransez, Gallimard desidio de publikarlo kon el nombre “Une librairie a Berlin”.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR