EL LIVRO DE KOZINA DE ALICE URBACH, ROVADO POR LOS NAZIS

Süzet FRANSEZ Judeo-Espanyol
15 Haziran 2022 Çarşamba

Los Nazis, no solo rovaron las koleksiones de arte de grande valor, ma tambien rovaron miliones de livros de los Judios durante la segunda gerra mundial i los arianizaron. Komo los livros no tienen la mizma atraktividad ke las pinturas, no supimos nada sovre este sujeto. Resientemente, los Estados Unidos i la Evropa izieron un plan para bushkar los livros rovados. Se sospecha ke una parte de 3,5 miliones de livros de la Biblioteka Central de Berlin fueron rovados por los Nazis. En los ultimos anyos, las bibliotekas de Alemanya i Austria retornaron 60.000 livros a 600 proprietarios.

Alice Urbach, nasida en 1886, engrandesida en una famiya rika, estava muy interesada en el arte de kozinar. Su papa era un grande merkader de tekstil en Vienna, un politiko de la komun judia i amigo de Theodor Hertzel. El no keria ke su ija se okupe de gizar, porke pensava ke no es una okupasion para su nivel. Se kazo i tuvo dos ijos. En 1921, su marido alkolik no rezistio muncho a la vida i Alice kedo sola para mantener su famiya. Tenia munchas reseftas ke kontenian platos tradisionales del payis kon una savor mas moderna. Se kijo azer “gizandera” profesional i  ensenyo a kozinar a las mujeres rikas de la sosiedad para mantenerse. En 1935, publiko un livro, “So kocht man in Vien” (Kozinar al estilo vienes) de 500 pajinas, sovre la kozina de la mujer moderna i tuvo un sukseso ekstraordinario. Ma komo savemos, la vida es lo ke te afita, kuando tu estas okupada aziendo planos diferentes. Asi fue por Alice Urbach. En 1939, empeso la gerra i kon sus ijos se fuyo a la Inglatierra. Los nazis kemaron munchos livros filozofikos i politikos eskritos por los judios, ma kontinuaron a publikar el livro de Alice, kon un nombre de otor diferente, Rudolph Rösch, persona ke no egzistio. En 1949, Alice torno a Vienna. Las sinagogas estavan kemadas. Sus tres ermanas se avian murido en el Olokosto i sovre todo su livro estava publikado kon un nombre diferente. Shokada kon korazon roto, eskrivio a la kaza editorial para tomar atras su derecho de su propio livro. Eya lucho durante anyos ma sin rezultado. Enstalada en San Fransisco, eya dio lisiones de kozina asta la fin de la dekada 90 i fue la profesora de kozina la mas aedada de los Estados Unidos ke aparesio en el kanal de televizion PBS.

Karina Urbach, su inyeta, istoriana ke bive en Alemanya, resivio un paketo de dokumentos sovre su abuela, Alice i entre las notas se rendio kuento de la egzistensia del livro de Alice. En 2020, Der Spiegel publiko una istoria sovre la evidensia del livro de Alice i el mizmo anyo, despues de 40 anyos de su muerte, los derechos del livro fueron dados a la famiya Urbach.

El muevo livro: “Alice’s Book: How the Nazis Stole My Grandmother’s Cookbook” eskrito por Karina Urbach.

Siz de yorumunuzu yapın

Tüm Yorumları Görün