Enveranada buena i klara

Silvyo OVADYA Judeo-Espanyol
15 Haziran 2022 Çarşamba

   Esta semana shabat i alhad estavamos  en la ada kon mi mujer. El tyempo no estava muy famozo. En primero le dishe a mi mujer: “ke echo tenemos en la Ada kon esta luvya ke vemos ke va turar diya entero. I me disho luvya aki, luvya aya; mos estamos indo. I mos fuimos. Ya savesh ke se topa en la ada dos Klubes Sosyal: el Anadolu Kulübü i el Klub de los djugos de la mar - Adalar Su Sporları Kulübü. I no se lo ke afita aya? Ma el Anadolu Klubu aksepto solo en un mez mas de 70 muevos miembros. La Corona i los diyas dospues de esta hazinura, muncha djente estan preferando de vinir a la Ada. Los anyos dalkavo munchas personas preferaron de ir a Bodrum o a Çeşme i Alacatı al lugar de vinir a la Ada. Ma komo el transporto de Estanbol a estos lugares i la manera de vida komo esta muy kara, munchas personas estan preferando de vinir a la Ada oy en diya.

    No se si  savesh ma este anyo las kazas se estan alkilando asta 10-12.000 dolares. Es siguro ke se topa kazas mas baratas. Ma esto es la demanda de los mansevos kon kriaturas.

   De la otra vanda, los presios  de los vapores i de los motores estan muy karos. I este modo, una partida de los ke vienen para pasar el diya no estan viniendo.

   La semana pasada estava envitado a un pranso de la Fondasion de Istoria. I una manseva estava asentada al lado de mi. Era akademisyana de istoria en la Universitad del Bosforo. I su marido ke se topava  en el mizmo pranso i el lavora en la mizma Universitad. I dospues me esta kontando ke van a tornar a la Büyükada. Una izla ke no konosen. Dospues ke tuvyeron una kriatura dyeron karar ke no pueden bivir en la sivdad kon una kriatura i dyeron karar de vinir a la ada. Ke koraje!!

   Estos anyos dalkavo, muncha djente ke puedemos kalifiar komo entelektuales estan viniendo a morar a la Ada. El Muzeo de la Ada en invierno organizo munchas aktivitades i para kada una avia bastante djente ke asistyeron.

  Kon los otobuses i los taksis la djente ke biven en la Ada estan muy kontentes. Dingunos no estan bushkando las arabas kon kavayos. La Ada esta mas limpia. 

   En el Klub Anadolu se topa dos mismo tres edifisios ke son empleados komo otel. I este enverano ay una gerra para pueder alkilar una kamareta los mezes de Julio i Agusto. Ni una kamareta. Ayudi a munchas personas para ke puedan topar una kamareta.

   Enveranada buena i klara kon sanedad i alegriya…

Siz de yorumunuzu yapın

Tüm Yorumları Görün