LA FYESTA DE LA REKOLTA “SHAVUOT”

Şeli GAON Judeo-Espanyol
9 Haziran 2022 Perşembe

Una de las fyestas la mas emportante de los djudyos, “Shavuot”, kontyene munchos nombres.

  • La kavza de la egzistensya de los djudyos, el Dyo, ke dyo la “TORA” i los “10 komandamyentos” en la montanya de Sinai a Moshe Rabenu.
  • Festival de las semanas,
  • Fyesta de las frutas,
  • Fyesta de la rekolta,

Shavuot es una fyesta emportante porke es la sigunda despues Pesah, de las fyestas “Shalosh Regalim” ke son Pesah, Shavuot i Sukot.

Shavuot no se fyesta syete dias komo Pesah i Sukot, se fyesta dos dias solamente, porke es la selebrasyon del puevlo de Israel ke aksepto la “TORA” (el orijen de la vida) todos aunados komo un korason.

El buto de la nasyon djudiya es de servir el Dyo. El kamino de servir es de ambezar i de pratikar la Tora kon los dyes komandamyentos ke son:

1-  “Yo so el Dyo ke te kiti de Ejipto i te salvi del esklavaje,

2-  No vas a tener otro Dio aparte de mi,

3-  No vas a utilizar el nombre del Dio sin menester,

4-  El dia de Shabat va ser syempre sakro para ti, vas a lavorar sesh dias i te vas a repozar Shabat ke es el dia Santo, dingunos de tu famiya no van a lavorar mizmo tus mosos, mosas...

5-  Vas a tener respekto a tu madre i a tu padre,

6-  No vas a matar a dingunos,

7-  No vas a mirar a la mujer del den frente,

8-  No vas a arrovar,

9-  No vas a testiguar avlando mentiras,

10-No vas a mirar a las kozas ke no te apartyenen”.

Shavout se va fyestar komo kada anyo en la sinagoga Italyana kon la prezensya del “Grande Rabino, Rav. Izak Haleva” i el presidente de la komunidad “İshak İbrahimzadeh”i “Erol Kohen”, en una atmosfera alegre.

El Dyo ke mos ayege para kada anyo kon salud buena, parnasa, reushita i pujados i non aminguados, AMEN…

Shavuot ya es el sinyo del empesijo del enverano.

El enverano es una sezon ke se bive kon muncho gusto i alegria despues de la primavera. Los dias se alargan, las noches se akurtan, la natura es yena de munchas kolores diferentes, se oye kantar los pasharos, las yervas se engrandesen, las flores enfloresen en los kampos, i las personas se syenten mas orozos de todo modo de evenemento, porke esta sezon plaze a todos.

Munchos de mozotros se van a las izlas, munchos viajan, i los ke se kedan en la sivdad, se van a la mar, todo el tyempo pasan afuera, en las kayes...

Se ampesa a vender las frutas del enverano ke son; las serezas, uvas, kayisis, avramilas, moras i otras.

El enverano arekayenta la persona. La natura se arribive; la kolor de las vedruras i del syelo, la mar, todo el entorno yeno de kolores bivas, ke alegran a la persona i se deviene mas positivos, i mas optimistos.

El sol del enverano mos arekayenta i mos aprovecha.

Puedemos profitar de los banyos de sol ke son yenos de vitamina D, kuran los romatizmos, los vitamines ke son emportantes por el desvelopamyento de los guesos se arrekojen del sol. La agua de mar es sana para munchas hazinuras del kuero i mo se arrebive, mos da una enerjiya de biviror orozos.

Kuando vyene el enverano las personas se syenten mas repozados, kalmos i kon ardor de bivir.

Los dias yenos de sol mos aklaran el korason, despues de los dias del invyerno largos, areskuros i yelados.

Las frutas i legumes del enverano son rikos de munchos vitamines i minerales ke es emportante por la salud de la persona.

Por egzempyo;

  •  El karpuz es yeno de vitamines i minerales i tyene una kapachitad grande de antioksidan.
  • El kayisi kon el shefteli son yenos de potasyum i de vitamin C.
  • La tomat proteja la sanedad del puerpo i del meoyo de los aedados.
  • La sevoya proteja la persona de las enfeksyones i kontra la hazinura maldicha: el kanser.

  No kreygo ke ay personas ke no les plaze el enverano…

 

 

 

 

 

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR