LO KE DEVEMOS DE AZER PARA SALVAR EL FUTURO DEL MUNDO

Şeli GAON Judeo-Espanyol
1 Haziran 2022 Çarşamba

El mundo es un lugar ermozo i es en mizmo tyempo el patron de milyones de personas, animales i yervas. Para salvar el mundo, es la ora de aksyonar.

Mos parese ke no puedemos azer nada individualmente para salvar la natura, la mar, la sivdad i otras kozas, i por esto no azemos nada. Ma, mos estamos yerrando porke mano kon mano se puede reushir a trokar syertas kozas para lo mijor.

Por egzempyo, empesaremos azer la ekonomiya de la elektrisidad, de la agua i del kombustivle para pueder salvar la natura ke es el sentro del oksijen ke respiramos para pueder bivir. Komo se puede azer la ekonomiya de la enerjiya, de la elektrisidad?

-       No kale deshar las luzes avyertas. Kale profitar de la luz del dia. Agora los dias se estan alargando.

-       Uzar los ampules Led.

-       No avrir el klima si no tenemos menester.

-       Uzar las makinas de lavar platos en los programes ekonomikos, i uzarlas kuando estan muy yenas.

-       Preferaremos el transporto publiko.

-       Utilizaremos las bateriyas rekargables. Las bateriyas ke se terminaron malorozamente tyenen munchos produktos kimikos i metales toksikos.

Ekonomizar la agua es muy emportante, porke los orijines de agua se estan aminguando de dia en dia.

La agua es muestro avenir. No puedemos bivir sin la agua.

Las fuentes ke korren en vaziyo es pekado i manziya.

En un mundo ande no ay agua, no se puede bivir.

Mizmo si semos una persona puedemos trokar munchas kozas.

Estamos konsumyendo el mundo en el ke bivimos muy rapidamente. Mientres un futuro mijor esta en muestras manos. Los chikos trokamyentos ke puedemos azer en muestra vida de kadal dia, puedemos tener un mundo mas vedre. Para salvar la natura:

-       Antes de echar las maskas, kortaremos las kuedras para ke no danyen a los animales.

-       Usaremos los shavones i los deterjanes ke no azen danyo a la natura.

-       No echaremos los bokales de agua de plastika, i los ramplasaremos por los reutilizables.

-       Uzaremos papel u bambu al lugar de kozas plastikas.

-       Lavoraremos komo voluntaryos en un refujyo de animales.

-       Todas las aguas de la tyerra no deven de ser kontaminadas kon reziduos umanos i animales, i materyales similares.

-       Uzar los alimpiadores kimikos danya no solamente a las personas, tambyen a la natura.

-       Los deterjanes ke se konsumen muncho kreen una grava kontaminasyon en la agua, lo ke menasa la vida de los animales ke biven en la agua.

-       No konsumaremos inkonsyentemente gazes danyozos.

-       Los pestisides, los spreyes para matar los insektos, los gazes… Esto todo es muy danyozo para el ozon i la natura. El uzo eksesivo de fosiles kombustibles komo el petrol i el karbon se estan transformando en luvyas asidikas.

Para krear la konsensya del entorno, kale realizar las aktividades edukativas i azer konferensyas.

 

 

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR