JOSEPH HABIB GEREZ MOS DESHO LA BUENA VIDA

El poeta, eskritor i pintor, Joseph Habib Gerez desho muestro mundo. Ke durma en pas en las luzes.

Dora NİYEGO Judeo-Espanyol
1 Haziran 2022 Çarşamba

Gerez nasio el 14 de junio del anyo 1926 en Ortaköy, Estanbol. Eskapo la eskola segondaria, Kabataş Lisesi en el anyo1950. No pudo kompletar su edukasion en la Fakultad de Derecho de la Universidad de Estanbol por modo ke teniya problemes de salud.

En 1955, el izo su servisio militar komo ofisye i segundo ofisye en la Eskola de Ofisiales de Rezerva en Ankara.

En la eskola de lingua Berlitz, Gerez ensenyo turko.

En el anyo 1961, Gerez fue el shef de kabine del Rav David Asseo, ke era el Gran Rabino del anyo1961 asta el anyo 1996.

Gerez publiko tredje livros de poeziya. Unos kuantos de sus poemas fueron traduizidos a linguas etranjeras. Habib Gerez eskrivio mas de sesenta artikolos. Una parte de estos artikolos fueron publikados en diferentes periodikos i revistas i en sus livros "Lo ke se dize al ayre" i "La savor de la vida es arte de sal".

Habib Gerez tiene unos sinkuenta livros emprimados.

Sus poemas fueron traduizidos al italiano i al fransez. El artisto resivyo el Premio de Poeziya de la Akademia Enternasionale di San Marco en 1979, 1985 i 1993, i el Premio de Poeziya "Plurizmo" del Sentro d'Arte La Prora i del Muvimento Aristiko Nazionale en 1980.

Habib Gerez inoguro 142 ekspozisiones personales, 33 de estas ekspozisyones fueron inoguradas en el etranjero. Gerez resivyo 63 premios en las ramas de pintura i poeziyas de los konkursos en los kualos el partisipo. 

Sus ovras son ekspozadas en "Arsonval Museum" i en "Troyes Museum of Fine Arts" en Fransia, en "Herstal Museum" en Beljika, en "Judah Magnes Museum" en EE.UU., i en "Jewish Art" i "Ben Ari" en Israel. En la Turkiya, sus ovras son ekspozadas en el Muzeo Selçuk Yaşar, en el Muzeo de Arte Moderno de Edirne i en el Muzeo de los Judios Turkos de la Fondasyon 500 Anyos.

 

La Akademia Evropea, ke es afiliada al Konsejo de Europa, entrego el "Grande Premio Evropeo", ke kada anyo se da solo a una persona, kon una seremonia de entrega de premios selebrada en Italia el 28 de junio de 1998. Le dieron este premio a Habib Gerez por sus aktividades en el arte durante kaje 50 anyos.

 

Siz de yorumunuzu yapın

Tüm Yorumları Görün