KEN ES MARTIN GREENFIELD?

Dora NİYEGO Judeo-Espanyol
25 Mayıs 2022 Çarşamba

Martin Greenfield Clothiers Ltd. ke es situado en Brooklyn, es una fabrika de tekstil por los ombres.

Martin Greenfield fondo esta fabrika en el anyo 1977, kuando la merko de GGG Clothes. En el anyo 1947, Greenfield empeso a lavorar komo un empyegado en GGG. Lavoro kon muncha ardor i kon anyos se izo el visprezidente de GGG. Despues ke merko la fabrika, sus ijos Jay and Tod, empesaron a lavorar kon el, i en el anyo 1980, el trio empeso a dirijar la fabrika kon grande reushita. 

Kuando teniya katorze anyos, Martin ke es de una famiya de Chekoslovakia, fue deportado a Auschwitz, ande el famozo doktor Mengele lo separo de su famiya. Uno de sus primeros rekuerdos del kampo de konsantrasion, es los botes briyantes de Mengele.

Despues ke fue separado de su famiya (i no los vido mas), Martin empeso a lavorar en el servisio de lavanderiya en el kampo. En lavando la kamiza de un gardian, la arazgo sin kerer. Lo aharvaron bueno, i le dieron una alguja i un ilo para ke la kuzga. Ma, este evento malorozo, valyo la pena, porke de aya empeso a ambezarse este ofisyo.

Despues ke la gerra eskapo, Martin emigro a los Estados Unidos, ande empeso a lavorar en GGG Clothes. Poko a poko suvyo los eskalones, emprimero se izo el visprezidente de la fabrika, i despues la merko.

Greenfield se izo el shastre de munchas personas selebres. En los anyos dalkavo, eskrivio sus memorias en un livro, i djugo el rolo de su vida en un filmo en la televizion. En la Amerika, le dieron el titolo de ‘el mas grande shastre de la Amerika’, i ‘el mas enteresante ombre del mundo’.

Greenfield eskrivio la istoria de su vida en su livro ‘Measure of a Man’. El livro esta empesando, en kontando komo lo tomaron de su kaza, komo lo transportaron al kampo de konsantrasion en Auschwitz, i komo el ‘Anjelo de Muerte’, Dr. Joseph Mengele lo separo de su famiya. ‘Measure of a Man’ es la estoria de un ombre ke sufriyo grandes espantos i grandes amarguras.

Greenfield kuzyo los kostumes de los mas selebros artistos komo Paul Newman, Leonardo di Caprio, i otros.  Aparte de los artistos, Greenfield kontinuo a kuzir por los prezidentes de los Estados Unidos, komo Eisenhower, Bill Clinton, i Barack Obama.

Eskrito kon onestedad, i a las vezes kon ironiya, ‘Measure of a Man’ es una memorya diferente de las otras. Esta memorya esta enspirando esperansa i esta amostrando la kapachedad de un ombre ke, despues ke peryo todo, empeso su vida de muevo kon grande kreensia, i reusho a ser el fondador del mas grande Imperio de Moda de la Amerika.

 

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR