En el anyo 1917, primer diya de Hanuka entro General Alenby kon sus soldados, a Yerushalayim. Los moradores de Yerushalayim estavan muy orozos i emosyonados. Estavan pensando ke “Los Otomanos estan saliendo de las tierras de Israel i los Inglezes estan entrando. Agora va ampesar un periodo muevo i mas bueno.”
El muzikologo aleman-judio Avraham Zvi Idelson ke oyo este haber en la radio, kon esta emosyon i alegriya, pishin eskrivio una poema kurta de mueve biervos. “Vini mos alegraremos i mos gozaremos. Vini kantaremos de alegriya. Espertavos amigos kon korason alegre.” Esta kantika estava yena de optimizmo, de todo lo ke kaliya para ke todos esten orozos. Dizen ke el se aviya enspirado de los biervos del Tehilim numero 118/24. Ma en el tehilim 118/24 solo estan los biervos, “nagila" i "venismeha”.
Agora kaje todos en el mundo entero konosen estos biervos i su muzika. Los biervos son biervos muevos ma la muzika es muy antigua. La muzika es una muzika hasidika muy antigua, ke se kanta en la fiesta Simhat Tora. Idelson se akodro ke esta muzika la oyiya ande los hasidim en Yerushalayim.
Dina Starr, la ija del muzikologo judio amerikano, Moshe Nathanson, disho ke su padre aviya eskrito los biervos de la kantika. Moshe Nathanson aviya estudiado en la yeshiva en Yerushalayim i en 1910 kuando teniya 11 anyos aviya eskrito biervos muevos para esta melodiya hasidika. De akel tiempo en delantre esta kantika fue muy famoza en Israel i en el mundo entero.
Harry Belafonte, el famozo kantador amerikano oyo esta kantika en los anyos '50. El estava asentado en un kafe en New York. En el anyo 1959, Harry dyo un konserto en Carnegie Hall i kanto esta kantika delantre de miles de djente. Ansina esta kantika se iso muy popular.
Elvis Presley, Bob Dylan, Dalida, Josephine Baker i otros kantaron “Hava Nagila”. Deep Purple de la Britania kanto esta kantika en 2011 i la kantadera Israelyana Yardena Arazi la kanto en Moskova en 2009.
Agora a munchos israelianos mas no les plaze esta kantika por ke la topan muy vieja i no moderna. Ma malgrado esto, en todas las Bar Mitzvas o en todas las bodas baylan kon esta kantika. En las olimpiades de Londra en 2012, el atlet Eli Reizman izo akrobasiya kon esta kantika “Hava Nagila” i gano la medalya de oro.
En el anyo 2012 salyo un filmo ke se yamo “Hava Nagila”. Era un filmo largo, sovre la istoria de esta kantika kurta.
