LAS MADRES DJUDİYAS (RİİR ES BUENO)

İsak ESKİNAZİ Judeo-Espanyol
11 Mayıs 2022 Çarşamba

Todas las madres son sagradas; ama la madre Djudiya tiene otra koza ke le da una savor dulse ke no se topa en otra uma.

La granmama esta eksplikando a su inyeto ke kere vinir a vijitarla, el adreso de su mueva kaza: “Vas a apretar kon tu kovdo el numero 140. El asansör esta por la derecha; entrando vas a apretar el botón 14 kon el kovdo. En el kat 14 abasha i apreta el botón de la puerta 140 kon el kovdo.

“Granmama, ya te entendí, ama porke me dizes de apretar los botones kon el kovdo?

“Komo, las manos vaziyas vas a vinir?”

Tenemos una ijika ke bive en Londra. El otro diya telefona i demanda a su madre: “Mama, komo estas?” La madre le responde, “Ija miya, esto muy flaka”. “Ke pasa, porke te aflakates?” “Ay kinze diyas ke no esto komyendo”. “Ke afito, porke no estas komyendo?” “Porke ne keriya tener la boka yena en el momento ke me ivas a yamar”.

La madre djudiya aze este anunsyo en el telefon: Por noche Shabat si keren poyo, apreten el numero 2, si keren almodrote apreten el numero 3, si keren gaya kon avramila, apreten el numero 4. I si keren  saver komo me siento, este numero es yerrado porke asta agora no me tenesh demandado komo esto.

La madre djudiya yeva a su ijika a la eskola dizyendole, “Presyadika, ke estes repozada en la klasa. Hanumika ke no te ensuzyes, Luzyika no koryas en la guerta”. Al tornar por la tadre, la madre le demanda: Dime korasoniko, ke te ambezates oy? La ijika responde: “Me ambezi ke mi nombre es Sara.”

La Sinyora Levi, se va a vijitar su ijo Moris, ke bive kon su amiga, Rina en la mizma kaza i se da kuenta ke la amiga de su ijo es mas ke ermoza. De la manera ke estava mirando a la ijika, el ijo dize a su madre: “No kreyas ke tengo relasyon kon Rina, kada uno mos echamos en kamaretas separadas.” Después de unos diyas, Rina dize a Moris, “Desde el diya ke vino tu madre, la bonbonyera dezaperesyo; no kreyo ke la tomo ama puedemos demandarle para asegurarmos. Dunke Moris eskrive a su madre: “No digo ke no tomates la bonbonyera, i no digo ke la tomates; ama desde el diya ke vinites a vermos, la bonbonyera dezaparesyo. Bezos, Moris”. Madam Levi responde: “ No digo ke no te echas kon Rina i no digo ke te echas kon eya; ama si Rina se estava echando en su kama, iva topar la bonbonyera desde el diya ke vine a vijitarvos. Bezos, pasha de la Madre”

Dunke nunka  dizir mintiras a una Madre Djudiya.

Madam Kohen regala a su ijo dos kravatas. Después de unos diyas el ijo se mete una de las kravatas para ir a ver su madre. Apenas ke eya avre la puerta, demanda a su ijo: “Albertiko, la otra kravata no te plazyo?”

La sinyora Behar kon sus dos inyetos se va al parko. Le demandan: “Ke edad tienen tus inyetos?” i eya les responde: “ El doktor tiene 6 anyos i el avokado va tener 4 en poko tiempo”.

«Dime Roza, ke pensas sovre la boda de David i Sara?» «No kreyo ke va durar muncho tiempo porke konosko la madre de David i la madre de Sara. Son dos Djudiyas ke no se keren bien.”

La madre Djudiya pardona i se olvida, ama nunka se olvida lo ke pardono.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR