KUALO SIGNIFIKA el 9 de Noviembre POR LOS ALMANES

Dora NİYEGO Judeo-Espanyol
27 Nisan 2022 Çarşamba

Kada anyo, el 9 de Noviembre aze akodrar a los almanes, dos evenemientos de la istoria. Este dia es el ‘Dia de alegriya’ i el ‘mas triste dia’ por eyos.

En el 9 de Noviembre 1938, sinagogas fueron kemadas en el pogrom de Kristallnacht. En la mezma data, 33 anyos atras de oy, la Pared de Berlin fue derrokada. Este dia es el ‘Dia del Destino’ por el pais.

En este dia, Berlin fiesta la unifikasion de las dos Almanyas. Konsiertos delantre la Puerta de Branderburgo, ekspozisiones en toda la sivdad, konferensias i programas en la televizion, son unas kuantas de estas aktividades.

Ma, kada anyo, la komemorasion de Kristallnacht asombra las selebrasiones. Kristallnacht es mensionado en los deskorsos, i en los sermones en la media. En medio de esta alegriya, no kale olvidar los pogromes de 1938.

Este anyo aze 94 anyos del chapitro el mas obskuro de la istoria almana. Kristallnacht fue un masakro sistematiko ke aze avenguersar los almanes. Este evenemiento no deve ser olvidado. El 9 de Noviembre mos aze akodrar ke la libertad es una koza ke kale gerreyar por obtenirla, i por defenderla.

Es verdad ke Almanya troko muncho.

Almanya, oy, es un pais riko, i djuga muy grande rolo en las desiziones de la Union Evropea.

La komunidad judia de Almanya tambien troko muncho. Kon 220.000 miembros, oy se izo la mas grande komunidad de Evropa. En el anyo 1989, munchos judios emigraron de la Rusia. Komo rezultado, muevas komunidades se establisieron, i muevas sinagogas fueron konstruidas. I ansi,  los rabinos pujaron. Dos eskolas rabinikas fueron establisidas tambien.

Antes ke los emigrantes vinieran,  la majorita de los judios de Almanya eran sovrebivientes del Olokosto, i refujiados. Munchos de eyos no estavan siguros si ivan a kedar en Almanya. No tenian rabinos en la komunidad, i por esta razon, no puedian tener una vida relijioza. Despues de la emigrasion, muevas komunidades fueron formadas. Munchos rabinos fueron emportados de Israel, ma i munchos fueron edukados en Almanya.

Los judios almanes estan aziendo grande esfuersos para pueder alkansar la juderia almana de anyos antes. El establisimiento de una universitad judia, kon munchos elevos judios i non-judios, es el empesijo de estos esfuersos.

Mezmo ke paso trenta i tres anyos de la unifikasion de los almanes, no se puede dizir ke la djente del este i del ueste se entegraron kompletamente. Se puede dizir la mezma koza mezmo por los judios. El rezultado de sesenta anyos de opresion, i de ateizmo dainda tiene una trasa. Los emigrantes judios dainda se sienten alienados de la identidad judia. Munchos almanes del este tambien no estan muy kontentes. Los almanes del oeste tienen mas altas ganansias i mijor echos. Ma, i las dos partes son kontra el rasizmo i el antisemitizmo.

Kristallnacht no puede ser olvidado. Esto es emposivle. Kada elevo esta al koryente de este chapitro de verguensa de la istoria almana.

erenansio, jerenansio i sus diktatores.

Jerenansio, jerenansio i sus destruidores.

Jerenansio, jerenansio i

sus atakantes.

Jerenansio, jerenansio i sus defensores

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR