Shevi Shel Pesah EL PASAJE POR LA MAR RUVYA

Judeo-Espanyol
20 Nisan 2022 Çarşamba

El puevlo Djudyo en estando en la sivdad nombrada Sukot, les apronto el Kriyador de una manera milagroza dos pilares; uno de fuego i uno de nuve ke iva adelantre de eyos. El pilar de fuego iva kon eyos la noche por arelumblarlos i el de nuve iva el diya por amostrarles el kamino. El segundo diya, diya de 16 Nisan enpeso a kaminar delantre el real, el pilar de nuve. I el puevlo se fueron detras de el, i pozaron a los kavos del dizyerto.

El Dyo Santo le enkomendo a Moshe Rabenu ke se tornaran atras de este kamino i ke apozen entre la mar ruvya i la forteresa de esta sivdad del Ejipto i los Djudyos izyeron ansi. Arivando a este lugar, se topa el puevlo en un estado muy perikolozo. El rey del Ejipto, vyendo ke los Djudyos tornaron de nuevo a este lugar pensa ke estan mareyados en el kamino, i no saven por ande ir i vinir. I olvidadose Paro de todos los males ke pasaron por su kavesa, se arepintyo ke izo deshar ir a los djudyos de su tyerra, i pedrer tantos esklavos. I arekoje una armada muy fuerte, i va presigir a el puevlo Djudyo. I los alkansa en este lugar, en el sejen diya ke salyeron de Misrayim. Alora se topa el puevlo Djudyo en el mas grande dezespero i no save ke azer.

Pero, el Todo Poderozo ya save lo ke aze. El le dize a Moshe Rabenu ke diga a el puevlo Djudyo ke no se espanten i ke enpesen a kaminar sovre la mar. I tu, le dize a Moshe Rabenu, ‘espande tu mano sovre la mar i partila i ke kamine el puevlo Djudyo por la mar komo si fuera en tyerra’.

Moshe Rabenu izo el komando del Kriyador, el Kriyador apareja un ayre, se seka la mar komo si fuera tyerra. En el empesijo de la noche setena, en el 21 Nisan entraron los Djudyos dyentro la mar i pasaron por ayi myentres la noche entera, kaminando komo se kamina por lo seko.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR