EL TIEMPO

Eliz GATENYO Judeo-Espanyol
20 Nisan 2022 Çarşamba

Oy vos kero avlar sovre el Tiempo. “El Tiempo” es una nosyon ke okupo las personas, los filozofes i los sientifikos durante munchos siglos.  En realidad, el tiempo no es una koza ke egziste, es un proseso de un evenimiento ke kontinua o el enviejesimiento de una egzistensya, i en este kavzo, es una envansyon del meoyo de la persona. Komo la siensia es bazada a la mezura i a pueder mezurar, el tiempo es divizado en pedasos ke yamamos, ora, minuto, segundo ets. I ansina es ke para mezurar esto todo, se envento un instrumento ke se yama “ora”. Dizimos ke pensamos ke puedemos azer todo el posivle para tener un poko mas de tiempo, ma malgrado esto lo pasamos en vanikas i tumbanikas. Todos bivimos un diya de 24 oras. Aparte de lo ke devemos de azer los echos de kada diya, keremos apartar un tiempo para azer lo ke mos plaze, un hobi o ir a tomar aver al bodre de la mar, por egzemplo.  El tiempo se ve komo una kavena ke es kompozada de los momentos ke vienen uno detras de otro. Si mirash de mas serka, vesh ke en realita, no ay tantos momentos. El solo momento ke posedamos es este momento de agora. La vida se bive en el prezente. El poeta Henry Van Dyke mos konta la relasyon ironika ke tenemos kon el tiempo: El tiempo, para los ke asperan ke pase presto, es muy avagar, para los ke se espantan, es muy presto, para los ke estan triste, es muy largo, para los ke estan alegres, es muy kurto, ma solamente para los ke aman, no ay tiempo. Keresh vervos en el pasado? Estavos a 1,5 metro leshos de algun espejo. La vizyon ke vesh, es en realidad vuestra vizyon de antes 10 nanosegundos. Alora kuando vos mirash al espejo, vos vesh un poko mas mansevos. La ora biolojika del puerpo, determina el tiempo otomatikamente. En muestros puerpos se topan 100 milyones de mono selulas. Kada una selula tiene su ora biyolojika. I en kada selula esta eskondida una mekanizma de mezurar el tiempo.  Para unos es grande sufriyensa de alevantar de la kama i ampesar al diya, i ay otros ke se sienten yenos de enerjiya en el mizmo tiempo de la demanyana. El tiempo ke amostra la ora, o la luz del sol o el tiempo de bever un kafe, es igual para todos. Kere dizir ke este kontrasto se topa aryentro de mozotros.

Esto dicho, me akodri ke en lo ke eramos mansevos, muestros paryentes mos diziyan ke mos gozemos de la manseves, ke supieramos la valor i ke no la gastemos en vaziyo. Agora me penso: Ke puediyamos azer? Meter el tiempo de la manseves aryentro de un katramiz i guadrarlo bueno bueno? Ahh keshke uviera una posibilita semejante. Metiya el katramiz en el mas ermozo kanton de mi kaza… Auguro ke pasemos muestro “TIEMPO” siempre kon alegriyas.

Siz de yorumunuzu yapın

Tüm Yorumları Görün