Asher Amado
.Yo: En el pasado, kada semana vijitava la kaza de mi nona i mi nono, komiya, azia los devuares de kaza i deskansava
?Nona: Estas ambierto pasha
?Yo: Si, si nona, tengo ambre, ke gizates oy
.Nona: Oy te apronti komidas muy savrozas
?Yo: Ke aprontates nona
.Nona: Te apronti agristada kon pishkado, supa de gayna i yuvetch
?Yo: Ke es esto
.Nona: Todo es muy savrozo; gosta, te va plazer
.Yo: Nona ke es esto, pápa de avane, salsika? Esto asemeja a tehina, es bizaro
.Nona: No, no, esto es agristada; es muy savrozo. Es savor de la alma
?Yo: I este mish-mash, ke es esto
Nona: Esto es yuvetch, muy savrozo es chishites de zarzavat
.Yo: Nona, yo no komo estas kozas ekstravagantes
?Nona: I ke komes en kaza pasha
.Yo: Shnitzel, chips, spageti bolonez, arroz seko i guevos
Nona: Aki no es restorante. Yo no so master-shef, el program ke ay en la television, kuando meten en chini grande dos ojas de pazi, meten enriva un pokito de azete i lo yaman pranso de reyes. Yo gizo simple, komida de kaza. Kome, kome pasha
Yo: Nona master shef, master shef
Nona: Ke se dize, pasha kome
Yo: No, no, no puedo komer estas komidas
Nono: Furtune hanum deshalo, el no kome muestras komidas, el es akostumbrado a komer komidas de su madre. Su madre es ashkenazia i aya komen livyano. Azete liviana! Ayde, giza le gayna frita i patatas fritas i el ijiko se va kontentarse
Nona: Haymiko pasha, este inyeto es charpeado, kavesa de lenyo, no va komer las komidas miyas? Mi nona, ke este en Gan-Eden, se dezmayava si sintiya ke mi inyeto presiozo no kere gostar mis komidas. Dos bokales de kolonya Turka no abastavan. Mas no le va gizar nada
Nono: Hanum no te aravyes, la tansion te va suvir. Es ijiko bueno, elevo bueno, se va azer doktor; kalmate presiada
Yo: La semana sigiente arivi en la kaza de mi nona, los dos no kitaron ni un biervo de la boka, asentandosen komo dos mudos
Yo: Nona i nono estash buenikos
Nona: Si, si presiado, estamos sanos i rezios
Yo: Nona tengo ambre, esto muerto de komer
Nona: Oy no gizi nada, los gizandones salieron en vakansas
Yo: Nona esto muerto de ambre
Nona: Te va aprontar guevo kon tomat
Yo: Nona esto es shakshuka
Nona: Ke se aga shalshuka
Yo: Nona shakshuka no shalshuka
Nona: Ke se dize! Kome, kome, ya avlates bastante
Yo: La semana sigiente ampesi a komer las komidas de mi nona. Agristada, bamya, yuvetch, dolmas, kuftikas de karne kon tomat, pishkado bivo, berenjena frita i asada, kuftikas de prasa, kalvasikas kon karne, malebi i tishpishti savrozo. Kada komida de chupar los dedikos
.Ama, mas ke me plaze las komidas de mi nona, los bezikos i los abrasos de me nona i mi nono son mas savrozos de las komidas
