LA PATAGONIA I SUS SIELOS FABULOSOS

Süzet FRANSEZ Judeo-Espanyol
6 Nisan 2022 Çarşamba

Despues de rodear kuatro dias en las avenidas i parkos de Buenos Aires, tomimos el avion i en tres oras estavamos en El Calafate, sivdad de Patagonia. El Calafate, la kapital de los Glasiares, deve su nombre a un arbusto jigantesko, tipiko del Este de Patagonia ke tiene flores amariyas en primavera, i frutos morados enverano. Segun la tradision “ken kome de este fruto retornara siempre a la Patagonia”. Malorozamente, yo no tuve la suerte de gostar de este fruto.

A la manyana, teniamos el tur para vijitar el Perito Moreno, ke es el mas konosido i el mas grandiozo de los Glasiares del Parko Nasional. Kuando yegimos en frente del glasiar, estuvimos ipnotizados por un sierto tiempo. Esta vista impresionante i inolvidable, se eskrivio en la memoria mia i de todos los ke la kontemplaron. El glasiar i la Patagonia, fue para mi, una eksperiensa para entender un poko el funksyonamente del universo i el poder de la natura.

El Calafate, parese muncho a una chika sivdad de los Alpes. No siendo muy developada, sus magazenes i sus restorantes tienen una atmosfer satisfezante. Despues de tres dias en El Calafate, tomimos kamino verso El Chalten, otra sivdad ariento del Parke Nasional, a 220 km. En el kamino, estavamos kontemplando los sielos de Patagonia, una atraksion partikular, porke se difera en kada momento. Su beyeza de dia i de noche proviene del fenomeno de la luz solar i el azul de los sielos de esta partida de la atmosfera, es muncho mas fuerte de los diversos sielos del mundo. La noche, en este hemisferio del Sud, las estreyas briyan mas ke en el Norte. Esta forma partikular i la kolor fuerte de estos sielos del Sud, provienen de la pozision jeografika i es por esto ke el sielo se ve diferente de las otras partes del mundo.

Komo El Calafate tiene su glasiar el Perito Moreno, El Chalten tiene su montania de granit, Cerro Fitz Roy, 3406 m, i se situa en la frontiera de Shili i de Argentina. Es un lugar sin kontaminasion, para turizmo de aventura i el monte Fitz Roy es una atraksion para los ke azen “trekking”. Hay tambien ekspedisiones i ekskursiones para los ke keren pasear i ver paizajes sin azer muncho esfuerso. Mozotros estavamos en este grupo bushkando kaminos fasil entre 5-10 km i kon vista. El Chalten, en 1991 tenia solamente 41 habitantes i oy tiene kaji 2000. Kon los anyos, se izo un lugar kon vijitantes de todas las partes del mundo ke keren konoser el Fitz Roy i sus numerosas aguas de granito.

Este anyo en febrero, 50 sientifikos de la NASA, vijitaron la Provinsia del Chubut en Argentina, para azer observasiones astronomikas i ayudar a eskrivir una pajina importante para la Astronomia. Ver por la primera vez un sielo patagoniko es koza ke no se olvida fasilmente. Es un paseo kozmiko por el pasado, prezente i futuro del Sistema Solar i de la Tierra Planeta.

“Viajamos para trokar no de lugar, sino de ideas”.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR