El puevlo de Israel esta biviendo en una jeografia difisil, enturado de enemigos. La kareza en el pais esta muy alta. En kada kaza kale marido i mujer ke lavoren para ke puedan mantenersen. Ijos i ijas kale ke se vaygan a la armada, no es posivle de pueder fuyir de este dover. La teror los esta enfasyando. Mezmo ke los relijiozos eksesivos no se keren ir a la armada, el governo esta kontinuando a ayudarles. La politika esta entrefikada. No es solo estos problemes. Tienen munchos mas problemes ke no puedemos saver de enfrente.
Un pais kon este karar de difikultades esta elijido el mueven orozo paiz del mundo. No es una surpriz. Kada vez ke les demandas komo estan, te responden ‘Baruh Ashem’!
Israel esta okupando el mueven lugar en el Raporto Mondial de la Felisidad 2022 emitido por las Nasiones Unidas el 18 de marzo. Los tres anyos ke pasimos, Israel okupo el dodjen lugar ke era la pozision la mas alta ke tomo fin agora.
Los paizes en el "Top10" son: Finlandia, Danimarka, Izlandia, Suiza, Paizes Bashos, Luksemburgo, Suesia, Noruega, Israel, Nueva Zelanda.
Este anyo marka el diezen aniversario del Raporto Mondial de la Felisidad. En este raporto ay datos ke mos esta enformando komo las personas de 150 paizes estan evaluando sus proprias vidas. Aparte de las evaluasiones de las personas konsernando sus proprias vidas, en las kestiones ay variables ke inkluyen el apoyo sosial, la esperanza del governo por la salud, i las persepsiones sovre la libertad, la jenerosidad i el abuzo.
Lo ke es enteresante es ke Israel esta klasifikado entre los 10 paizes dalkavo, segun kuantos de los ke partisiparon a la anketa estan preferando una vida trankila en lugar de una vida emosionante.
El Informe Mondial de la Felisidad 2022 revela una luz briyante en tiempos obskuros. La pandemia trusho no solo dolor i sufrimiento, sino tambien una pujita en el apoyo sosial i la benevolensia. Mientras luchamos kontra los males de la enfermedad i la gerra, es esensiel rekordar el dezeo universal de felisidad i la kapasidad de las personas para ayudarsen unos a los otros en tiempos de grande nesesidad.
