Shemini

Rav Yeuda ADONİ Judeo-Espanyol
23 Mart 2022 Çarşamba

El santuvaryo es el korason de el puevlo djudyo, el sentro de la vida spiritual de los fideles. En el santuvaryo nos rankontramos kon el Kriyador. Ansi la sinagoga es el lugar onde nos arekojemos la kolektividad por sirvir i orasyonar a el Todo Poderozo.

En azyendo el sirvisyo a el Sinyor de el mundo es ke estamos enfrente de el i denusyamos las orasyones. Sertemos nuestro korason. El nos responde a nozotros.

Ayi vemos ke se topa la divinidad. El de las alturas vyene a rankontrarse kon nozotros. Ansi ke nuestras orasyones suven a los syelos. La luz ke abasha direktamente de los syelos a el santuvaryo, akeya luz misma aze suvir a nuestras demandas a el, mismo aze suvir nuestras demandas a el trono de su santedad. El nos manda una eskalera i nozotros suvimos kon esta eskalera.

En el santuvaryo egzistiya atkuendos i objetos, la meza onde se topava los panes ‘Lehem apanin” i la menora. La kultura de el puevlo. La kultura djunto el mantenimyento forman la vida de el ombre. Dunke el santuvaryo da su luz santa a kada persona i persona.

Los sirvidores de el santuvaryo son los Saturdes (Koanim); eyos apartyenen a el puevlo djudyo.

En la perasha de Shemini vemos el estrenamyento de el Mishkan, el Tabernaklo. El estrenamyento de el tabernaklo se realizo kon sakrifisyos ke se ayegaron en syete diyas. Los diyas ke abasho la shehina, la divinidad a el santuvaryo. En el ochen diya yamo Moshe Rabenu a Aaron, su ermano ke era Koen Gadol, i a sus kuatro ijos.

Vayidom Aaron en este estrenamyento Aaron Akoen piedre a los dos ijos Nadav Vaaviv. Aaron Akoen no avla ni un biervo.

La kayades, dizen nuestros savyos, la kayedes de Aaron fue ke resivyo el djuzgo de el Kriyador.

La kayades es una koza grande. Si un biervo vale una lira, la kayades vale dos. En este mundo el ombre deve saver kuando va avlar i kuando deve estar kayado. Ansi gana su salud.  

 

Siz de yorumunuzu yapın

Tüm Yorumları Görün