La inyeve ke tuvimos este mez, no es una koza muy rara por Estanbol. En los siglos pasados, la istorya mos konta ke afito kayida de inyeve mas fuerte de lo ke vimos la semana pasada. El eskrito mas viejo ke tenemos sovre invyernos fuertes, es de la epoka del emperador Arcadius, ijo de Theodosius ke fraguo las murayas en el siglo sinko ke dayinda están aya, las kostas del Kuerno de Oro i del Bosforo, se izyeron buz.
En el anyo 763, todo el Kuerno de Oro i todo el Bosforo se yeno de blokes de buz ke vinyeron del Mar Preto. Se eskrivyo ke el buz teniya una profundidad de kaji 30 santimetros. Se dize mizmo ke la djente paso el Bosforo de un lado al otro ensima de estos blokes. Este evenemento se repeto munchas vezes duranto los siglos pasados. En el anyo 1954, aviyamos tenido la mizma koza i yo tanbien ke era adolesente, me akodro ke aviya kaminado ensima del buz. En 1621, el friyo fue tan fuerte ke las aguas se entezaron en las fuentes publikas ande todos se ivan kon kuvos para inchir agua i los sakas ke trayiyan agua para bever, no pudieron salir por esta razón. Los ke no teniyan bastante agua en las tinajas de sus kazas, sufriyeron muncho de la mankura de agua i la djente de Estanbol, de mankura de pan i de otros produktos alimentaryos.
EL BOSFORO EN 1954
En los anyos pasados kuando el invierno era muy fuerte, oyiyamos ke los lovos i los puerkos salvajes viniyan asta
muy serka del sentro de la sivdad i la djente tenia espanto de salir por la noche. Los solos ke se alegravan eran las kriyaturas ke djugavan en la inyeve i ke no se ivan a la eskola. Uvo inviernos kuando las eskolas se serraron durante kaji tres semanas.
Tenemos la shans ke en Estanbol bivimos las kuatro sezones komo la muzika de Vivaldi aunke mos keshamos i del friyo i de la kalor.
Esto mos da a pensar ke el ombre deve de luchar kon la natura i apresiar sus trokamientos. Es así ke el renasimyento de la natura se puede selebrar. Kuando el ombre siente este trokamiento apresya también su umeldad delante la Kreasyon.
GÖZTEPE 1929
