Avram Mizrahi
El anyo 1917 fue un anyo de ventura en la vida del eskrivano djudyo, Franz Kafka. Los doktores toparon ke Kafka sufre de tikiya. En este mizmo anyo, ampeso Kafka a ambezarse de el para el la lingua ebreya. Max Brod, su amigo muy serkano i entim, kedo enkantado. En sesh mezes se ambeza ebreyo i no le dize a el, ma es ke Kafka se enteresa en azer Aliyah. Sionismo? I ampesan a korrespondersen sovre el sujeto, i entiende Brod ke su amigo kere saver sovre sus raizes djudyos, meldar la Bibla en su lingua orijinal, i sovre lo ke esta afitando en el koryente sosialista en Palestina.
Esto todo lo savemos de los ocho tefteres en ebreo ke se topan en la Biblioteka Nasional en Yerushalayim ke fue resivido de Max Brod, ke komo se save refuzo la demanda de Kafka de destruyir todo sus ovras i eskrituryas despues de su muerte.
Ken era la profesora de este briyante entelektual?
Una manseva Sabra de Palestina ke se yamava Puah Ben Tovim, ke ariva a Prag para estudyar la medisina.
En el anyo de alkavo de su vida, 1924, le konta a su kerida Dora Diamant ke pensa de aresentarse en la Tierra de Israel para avrir una lokanta ke va dar a komer a los Halutzim, i Dora se puede okupar del gizado. De este proyekto le avla a su amigo filozofo, Samuel Hugo Bergman i su mujer ke estan dakordo kon el, i eyos parten a Israel.
En todo estudya Kafka siete anyos i malorozamente el suenyo de ir a Palestina i avrir la lokanta no se realiza, la tikiya lo mata.
