Anyo bisyesto, mezes de Adar veAdar

Metin DELEVİ Judeo-Espanyol
9 Mart 2022 Çarşamba

El kalendaryo solar ke se yama gregoriano utilizado por el mundo oksidental, se baza en el siklo del sol. El anyo tropikal (solar) tyene 365 dias, 5 oras, 49 puntos i 16 segundos. Ansi, para kompensar la perdida de 5 3/4 oras kada anyo, kada kuatro anyos se mete un dia ekstra a la fin del mez de Febrayo.

Diferentemente de la sosyedad oksidental, los djudios, muzulmanes i chinezos utilizan el kalendaryo lunar. Komo el kalendaryo solar, el kalendaryo lunar tyene 12 mezes, kada mez mezurado por la luna kresyente i minguante.

Achakes ke el kalendaryo lunar tyene solo 354 dias i no koresponde al siklo solar, el kalendaryo lunar no se va senkronizar kon las sezones sin tener en kuento los dias adisyonales en el kalendaryo solar. Sin esto, un mez lunar puede vinir en primavera un anyo i en invyerno al sigiente. La mankura de senkronizasyon entre los mezes lunares i las sezones no iva ser un problem para el kalendaryo djudio si no rezultava en una kontradiksyon kon un mandato bíbliko: “Observa el mez de Aviv (primavera), i fyesta Pesah al nombre del Dyo, Todo Poderozo; porke en el mez de Aviv, una noche, el Dyo te kito de Ejipto” (Deuteronomio 16:1).

Por modo de este orden bibliko, la fyesta de Pesah deve observarse en la primavera. Para akumplir esto, el mez de Adar se duplika durante un anyo bisyesto (Adar I i Adar II o Adar veAdar). Porke el mez de Adar? Antes de ke el kalendaryo djudio fue fiksado despues de kalkolos matematikos aproksimadamente en los anyos 350, el muevo mez fue determinado por el Sanedrín bazandose en el testimonyo de testigos ke aviyan visto la mueva luna. De la mezma manera, el Sanedrín deklaro el anyo bisyesto bazandose a sus observasyones de las sezones. Adar, el ultimo mez antes de Nissan (el mez de Pesah) era la data limita para deklarar un anyo bisyesto.

Segun el kalendaryo aktual, un anyo bisyesto djudio ariva syete vezes kada 19 anyos. Este anyo, 5782, es un anyo bisyesto, i el mez de Adar I empesa el Martes 2 de Febrayo la noche despues de la echadura del sol i Adar II el kuatro de Marso.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR