HARVEY WEINSTEIN i el MOVIMIENTO, “Me Too”

Süzet FRANSEZ Judeo-Espanyol
2 Mart 2022 Çarşamba

En la istoria de Hollywood se oyiya munchos skandalos sovre el abuzo seksual, ma dingun kavzo no se publikava. El espanto de piedrer el lavoro, yevava los aktores a la “KAYADES”. El kavzo del skandalo de Harvey Weinstein, ayudo a la propagasion del movimiento “Me, Too”.

En el anyo 1979, Harvey Weinstein i su ermano Bob, fundaron la famoza kompania Miramax, ande el nombre fue formado de los nombres de sus padres Miriam i Max.  Produsieron filmos ekstraordinarios i munchos fueron katalogados en la istoria sinematografika: Pulp Fiction (1994), Shakespeare in Love (1998), Gangs of Newyork (2002),  Inglorious Bastards (2009) i kon el filmo The English Patient obtuvo su primer Oscar en 1996, i munchos otros Oscares. Ma en vezes, la fama, el poder i la moneda puede kavzar una deformasion moral de la persona. Esto es lo ke okurro kon Harvey Weinstein. El era una de las personas las mas famozas de Hollywood, ma estava abuzando seksualmente sus artistas.

Despues ke dos artistas se kesharon de Weinstein en 2017, la artista Alyssa Milano, eskrivio un “twit”, i demando a las personas ke pasaron abuzo en sus vidas, de reklamarlo. Ken kere, puedia kontar su eksperiensia de abuzo kon el titolo de “Me, Too”. Eya no pensava ke esta pajina iva tener tantos partisipantes. Despues de un dia, su “twit” tenia mas de medio milion de sigientes i munchos denunsiavan sus sekretos de abuzo, keshandosen de las personas las mas serkanas de la famiya i de sus abuzos en el lavoro.

En esta pajina de “Me, Too”, munchas artistas famozas komo Gwyneth Paltrow, Ashley Judd, Jennifer Lawrence, Nicole Kidman, Selma Hayek, Uma Thurman etc. eskrivieron sus eksperiensias de abuzo i avrieron el kamino para ke las viktimas  del mizmo kavzo,  puedan avlar i kontar sus problemas. Este movimiento se propajo en 85 payizes i la pajina kedo aktual durante 100 diyas. Los abuzados o abuzadas entendieron ke el espanto i la kayades no sierve para nada. Solo kon avlar, kontar i partajar se puede atirar la atension del mundo. Asi esperamos ke este movimiento, servira a kontrolar i a detener los sentimientos inapropriados de las personas i dar la fuersa de revelasion a los abuzados.

Una estreya briyante se desparesio de Hollywood por sus aktos immorales. Harvey Weinstein fue akuzado i aprizionado por 23 anyos.

Siz de yorumunuzu yapın

Tüm Yorumları Görün