En el livro, “Las Reseftas Mundiyal De La Shokola Djudiya”, ke Michael Leventhal eskrivyo, dize ke el rolo del Djudyo en la shokola es muy grande. Segun el, los merkadores o los Konversos ke eran Djudyos i ke trokaron en falso la relijyon para mostrarsen Kristyanos en el tyempo de la enkizisyon, estavan kompletamente entremetidos en el komersyo de importar i vender los granos de kakao. Por siguro ke se ambezaron a azer la Shokola kon estos granos, i a ser ekspulsados, se yevaron esta saviduriya a la diaspora.
Aze tres anyos, el eskritor de este livro, se fue a Bayonne, una sivdad en el sud de Fransya, djusto a la frontera kon Espanya, savyendo ke Bayonne fue i es el sentro de la fabrikasyon de shokola en este payiz i estudyó en los dos muzeos de shokola ke se topan en esta sivdad. Aya se ambezo ke en el siglo 17, bivyo en Bayonne una komunidad Djudiya ke se dediko a la endustriya de granos de kakao.
Kuando los orneros Djudyos empesaron a fabrikar gatós de shokola ke plazyo muncho, en 1720, salyo la ley prohibyendo a los Djudyos de Bayonne la fabrikasyon de shokola. De los mismos estudyos, el eskritor se ambezo ke el arte de shokola se espandyo a la Evropa i en la Amerika del Norte grasyas a los komersyantes Djudyos. En 1650, un Djudyo de nombre Jacob, avyo en Inglatierra la kafeteriya ande sirvyo por primera vez, kafe i shokola kayente. Otro Djudyo en Beljika empeso a azer shokolata komo konosemos. La mas vyeja resefta de gató echo kon shokola i almendra ke fue transmetida de madre a ija, paso a ser eskrita en Ladino i despues en Fransez por una famiya djudiya de Bayonne.
El revenido de la vendidad de este livro, esta sirvyendo a ayudar los fondos de la organizasyon, “Chai Cancer Care”, una organizasyon ke ayuda los myembros de la komunidad Djudiya de Inglaterra.
Ke byen ke la byenfezensya i la savor unika de la shokola se kompletan en este alto nivel.
Fuente : Tomado del artikulo de Rachel Ringler
