El proyekto de ley sovre el retorno a los desendientes, 15 objetos ke fueron rovados de famiyas judiyas, fue akseptado kon unanimidad en la Asemblea Nasyonala Franseza.
En el Parlamento Franses, fue metido a voto un proyekto de ley, diziendo ke todas las ovras rovadas de los Judios por los Nazistos en el tiempo de la Segunda Gerra Mundiala, ke se topan en los muzeos del estado, van a ser dado atras. I este proyekto de ley ke dize de dar atras las 15 ovras a los eredadores de las famiyas Judiyas fue akseptada por la Asamblea Nasiyonala. Si este proyekto pasa por el Senato tanbien, va ser la primera ley ke fue akseptada en la istorya de la Fransya, ke mensyona el sujeto de dar atras las ovras de arte rovadas de las famiyas judiyas.
Mientres, la Ministra de Kultura Franseza, Roselyne Bachelot, disho ke esta ley es “istorika”. Entre las ovras ke se van a dar atras a las famiyas eredadores se topa la famoza ovra de Gustav Klimt ke se yama “Rosebushes Under the Trees” (Arvolikos de rozas debasho de los arvoles). Esta ovra se va dar a los desendientes de la famiya de Nora Stiansy. Eya fue forsada a vender(!) este tabló en Agosto 1938. Despues la deportaron a la Polonya i fue matada aya en 1942. Este tablo es la sola ovra de Klimt ke poseda la Fransia. Estava ekspozada en el Muzeo d’Orsay. La BBC disho ke en una vendida en Sotherby’s en Londra un tablo de flores de Klimt se vendio a 50.000 dolares. Ma este tablo de Rosebushes dainda no fue ekspertisado ni apresiyado.
Tanbien ay otra ovra para retornarla, de Marc Chagall, yamada “The Father” (El Padre).
Entre estas ovras, se topan ovras de arte ke estan ekspozadas en el Museo Louvre.
