KONSEJOS

Forti BAROKAS Judeo-Espanyol
23 Şubat 2022 Çarşamba

“Para ambezar no ay edad” es una dicha muy djusta. Si sos kuryoza i te plaze ambezar, ay munchos kanales de bushkar.  Yo so amatora de radyo, en vezes me dizen en avyendo televizyon, kualo topas en la radyo? Si, la televizyon es una grande kompaniya ama no esto pudyendo suportar a las seriyas turkas, largas, yenas de negreguras, todos los sujetos mizmos.

  Tengo kanales espesyales. Por egzempyo, komo me vo al kurso de muzika turka, tengo un kanal enteramente de muzika turka. Aparte de sintir kantikas, da a entender las vidas de los kompozitores i las kantikas por ken las kompozaron. Este kanal lo syento kuando me echo a la kama; en sintyendo, me kedo durmiendo, me pasa por kantika de kuna. Tengo otro kanal de muzika klasika; esto lo syento kuando eskrivo seya senaryos seya a la gazeta. I las demanyanas lo syento a mi ijiko ke es DJ en un radyo. Ya es avliston ma yene kedo kuryoza dande topa tantos sujetos. Ayer, en prezentando las kantikas, kon una ironiya, se kesho de los ke dan konjejos sin menester.

Mi madre diziya, “konsejos de perros vyejos”.

En la Büyükada los diyas de djugeves ay pazariko. Yo me vo temprano antes ke puje la kalor. En empleyando fasulyas, una konosida, sin dizir bonjour a las ocho de demanyana,

--- Oyeme! Toma vijna, esta muy ermoza, lavala buena buena, kita los kueshkos, metela kon asukar de la noche,

--- No, yooo...

--- Buyela a petit feu, despues…

--- Yo no va azer dulse de vijna

--- Atyo, asukar tyenes? Toma un limon kada demanyana kon agua tivya…

--- No, no tengo asukar!

--- Nooo…. ayde eskapa el Paza,r vate a la eskala, beve un chay kon un ermozo börek. Ay murir!

Lo mas terivle es, ken da konsejos de kuras i nombres de doktores, ten pekados i dizele ke tyenes una dolor, ya bolates!

--- Demanyana toma dos voltarenes, a la noche, oras de echar otros dos, nada no te keda

--- Yo empleyo syertas kuras, si tomo kuatro voltarenes al diya, me vo al otro mundo; es vedra ke no me keda nada!

--- Ayde, no ay dingun ma;l tu oyeme a mi, me vas a bendizir!

Ay ken da konsejos de lugares de vakansas i nombres de oteles. Te vas, ni el otel vale, las komidas dezgrasya; si la oyes, te sale las vakansas por la nariz.

Si oyen ke tyenes djente, barminan!

--- Aze una tarama, unas dolmaikas, un piyaz, arroz i gayna, i por dulsurya…

--- No, los va yevar afuera a komer

--- Vate a tal restoran, aya es mas barato; un pishkado alavado

---  Mozos no keremos...

--- No keres pishkado? En Yeşilköy ay un kebapchi, aya yevalos, aze un lahmadjun maraviyozo...

Komo estos ay miles de “konsejos de perros vyejos”.

 Por siguro ke ay menester de konsultar i ay personas savidas ke dan konsejos valutozos.

A todo lo ke konti ariva puedo suportar solo si me dizen, “Mira hanum yo si era de ti”. No! Ke no me digan es mijor!

Siz de yorumunuzu yapın

Tüm Yorumları Görün