DIDL 2022 en Estanbol

Silvyo OVADYA Judeo-Espanyol
16 Şubat 2022 Çarşamba

   Es ayer, alhad la noche, en el Enkontro de Alhad,  ke me ambezi la disparision del importante piyonario de la lingua Judeo-Espanyola, el sinyor Edmond Cohen ke bivia en Paris. Mos desho la buena vida. Ya se ke aparejava  programes para la radio en Fransia i tuvo un grande sukseso. Ke su alma repoze en Gan Eden. Ya se ke oy en diya dainda en Fransia ay personas ke avlan muestra lingua. Ma no se si son un shifro bastante. Si me akodro bien dos anyos i medio antes kuando estava kon eyos en Paris no vide mansevos ke estavan kon eyos.

   Es la mizma koza para todas las asosiasiones o para todas las komunidades. Es djusto ke tenemos mansevos ke lavoran para el Amaneser o el Şalom, para la lingua Judeo-Espanyola. Ma no son muy nombrozos. Si reushimos a ensenyar muestra lingua a los mansevos, kreo no vamos a diskutir mas sovre el futuro de muestra lingua.

   Vos kero avlar sovre el Diya del Ladino ke deviamos de realizar en Estanbol el 27 de este mez a la memoria de muestro amigo, Henri Çiprut. Estavamos en esperansa ke este Covid se iva eskapar i ivamos a pueder realizar este evenimyento en bivo. Teniamos de realizar una pyesa de teatro eskrita por Forti Barokas. I pensavamos de realisar el DIDL en el auditorium de muestra eskola.  En primero, no mos achetaron para las provas del teatro porke no kijieron ke personas ajenas vengan a la eskola i sean la razon de una mueva epidemia. I kon Karen dimos karar de azer las provas en la sala de la Sinagoga Neve Şalom ke se topa debasho del Muzeo Djudio.  

   Empesando a lavaror para el DIDL kon Karen, le demandi: “a ken pensas a envitar este anyo para este diya?” Sin tomar la repuesta le dishe ke devemos de envitar a Rachel Amado Bortnick. Reelmente es una persona muy presyoza. I para eya, la lingua Judeo-Espanyola es muy emportante. Es kapache de segir munchos programes zoom en un mizmo diya. Kon el grupo de e-mail “LadinoKomunita” ke formo, dyo a muncha djente el koraje de eskrivir en esta lingua. I el Djudezmo es su lingua maternal i es kapache de avlarmos buen karar de tyempo… Ma kuando dimos karar ke no puedemos realizar mizmo este anyo el DIDL en una sala, le telefonimos dizyendo ke va ser envitada el anyo vinidero.

   Es ayer ke me telefono Suzet Herman, demandandome si estamos realizando este diya i kuando. Todos ya konosesh a Suzet Herman ke kada anyo organizan parodiyas o teatros o meldan/kontan  artikolos en Judeo-Espanyol. I Suzet es kapache de kontar un teksto de vente puntos sin mirar al teksto. I vos djuro ke es kapache de kontar la mizma istoria kuatro mezes despues sin saltar ni un biervo.

   I dishe ke deviamos de azer una Reunyon en zoom para dar karar el diya ke devemos de azer este DIDL este anyo, espero por la vez dalkavo via zoom. En el proksimo numero del Şalom vash a pueder topar la data egzakta de muestra Reunion, DIDL.

Siz de yorumunuzu yapın

Tüm Yorumları Görün