Tu-Bishvat es la perioda ande los arvoles empesan a prepararsen a la primavera en el kalendaryo djudyo. Este anyo fyestimos Tu-Bishvat el 16.01.2022, alhad la noche.
Me akodri de los anyos pasados kuando biviya mi marido, Meir GAON z"l, komo de guste ke era arekojer toda la famiya, los ijos, los amigos i todas las frutas duzudeadas en los platos en el dorredor de la meza. Una meza ke aparejava kon muncha atansyon, ke no manke nada, i todos kon sira tomavan el plato en la mano ande esta la fruta, i diziya la beraha antes de komerla. Despues, gostavamos uno por uno en avlando, burlando i riyendo en una atmosfera kayente.
Malorozamente, oy no kedo nada de estas reunyones de famiya, de amigos a kavza de esta “Corona” maldicha ke no mos desho gana de bivir, de arrekojer a la famiya del espanto ke mos vamos a azer hazinos… Kero kontarvos los mesajes de esta fyesta emportante.
Tu-Bishvat es el anyo muevo de los arvoles porke en esta sezon los arvoles no toman la agua menesteroza de la tyerra, i se alimentan de sus propyas aguas i devienen sufisyentes. Aki estamos vyendo ke en primero, los arvoles toman la agua i despues dan las frutas menesterozas. “Tomar i Dar” es emportante por muestra felisita.
Tu-Bishvat es un punto de retorno komo la primavera ke vyene despues del invyerno, komo despues de la eskuridad vyene la luz. Mos embeza ke “Kuando muncho eskurese, es para amaneser”.
En esta fyesta se kome: Trigo, sevada, azitunas, uvas, igo, granada i datiles.
Tu-Bishvat es la fyesta del Respekto al Dyo i a sus kreasyones. Tu-Bishvat trusho kon si munchas tradisyones. Antes anyos kuando un ninyo nasia, la tradisyon era de plantar un arvole mansevo. Por el ijo, era un arvole de sedro (sedir).
Por la ija se plantava un arvole de sipres (selvi).
El sedro mostrava el poder i la fuersa, i el sipres sembolizava la trankilita i la golor agradavle.
Kuando estos ijos se ivan a kazar, las ramas arankadas de sus arvoles, dekoravan el entorno de la Hupa.
Este modo todos se ambezavan de dar kerensya i valor a los arvoles.
Hag Tu-Bishvat Sameah!
