EL FILMO, “KULÜP”

Şeli GAON Judeo-Espanyol
26 Ocak 2022 Çarşamba

               Matilda, ke aparteniya a una famiya sefaradi, morava en los anyos 1950 en Estambol, en el doredor de la “Kula” i “Pera”.

Este filmo es bazado sovre los evenementos ke paso Matilda en su vida, i la vida de Raşel, su ija.

Esta seria fue diskutida en munchos platformes, sovre todo ke avyo un espasyo para konfrontar la istorya. Es emportante, sovre el punto de vista ke dyo la posibilita de sintir el Ladino ke se esta desparesyendo a poko a poko malorozamente, en la sosyeta djudiya ke bive en la Turkiya.

             El sujeto de este filmo: Matilda, ke ay 17 anyos ke estuvo en la prizion, salyo kon el "perdon" en los anyos 1950, pensando de tener buenas relasyones kon la ija, Raşel ke no konose a su madre.

Kuando Matilda estava en la prizion, Raşel se engrandesyo en un orfelinato i le kontaron una istorya diferente por su famiya.

Kuando se rankontraron madre i ija, tuvyeron difikultades para tener relasyones kayentes entre eyas.

Raşel, kuando empesa a ambezarse las verdades de su madre, una solidarita krese entre eyas.

               Matilda empesa a lavorar komo lavandera en un klub de noche, ande el direktor fue amorozo de eya.

Raşel, su ija esta amoroza de un musulmano, ke es el “belali de la maalle”. Raşel no le disho ke es djudiya. La madre esta muy anksyoza por este kavzo.

Matilda, de ke empeso a lavorar en el klub de noche, troko la vida de todos los lavorantes en este klub. Todos se ampesaron a komportarsen komo una famiya.

               El eskritor kritiko del jurnal “Şalom”, Viktor Apalaçi, afirma ke es el filmo mas realista i mitikuloza realizada en el sinema turko, sovre los turkos no-musulmanos, las minoridades komo los djudyos ke syempre fueron karikaturizados sovre todos los espasyos. En munchos jurnales todo lo ke se eskrivyo sovre este filmo esta muy pozitivo.

               La seria Klüp, ke konta la istorya de los djudyos sefaradis ke bivyeron en Galata, atiro la atansyon del puevlo i vido grande entereso. Es por la primera vez ke los djudyos de Estambol se sorprendyeron de ver avlar el ladino sin yerro, azyendo las tradisyones komo la noche de shabbat, asender las kandelas de shabbat, el mantel blanko enriva la meza, todo djusto.

En esta seria ke refleto la vida i las tradisyones djudiyas de los djudyos ke biven en Turkiya, en akeya epoka, en la shena se avlava en ladino, partisiparon unas 70 personas ke avlan esta lingua. Los miembros de la komunita djudiya turka ke son ekspertos del ladino, fueron los konsejeros en este filmo para la lingua i para las tradisyones.

              “Kulüp” esta reprezantando Estambol, ke kontyene el musulmano, el grego, el djudyo, el armenio, el kurdo, el aristokrato, el kazalino, el ke emigro del kazal a la sivdad kon su “Saz” en la mano, los ijos ke no fueron akseptados por sus famiyas aristokratas a kavza ke son omoseksuales, komo el kantador, i los ke no vyeron famiyas…

Esta perioda fue refletada de una fason muy reushida.

La kaye “İstiklal”, los kostumes, las arabas, las vistimyentas de las personas, todo muy realisto…

Los evenementos de “Trakya”, ke todos los djudyos fueron ovligados de deshar sus bienes para emigrar a Estambol i a otros paizes, el “Varlık Vergisi”, el “6-7 Eylül Olayları” echo para ke los gregos deshen todo aki i ke se vayan a la Gresya;

estos evenementos manejados kon muncha sensibilidad i de una manera muy realista.

               Un grande “BRAVO” a los produktores, a los djugadores i a los ke metyeron esta ovra a la shena…

Felisitasyones…

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR