Kerido Vik, Difisil un anyo sin ti, rogando por ti, Repoza en Ganeden. No manki de pensar a ti... ESTİ

Esti SAUL Judeo-Espanyol
26 Ocak 2022 Çarşamba

Esto eskrivio muestra amiga de munchos anyos:

Konosi a Viktor Saul en los anyos ‘50, kuando mos enkontravamos i ivamos a baylar kon muestros grupos de mansevos i mansevas, en las Izlas de Estanbol. Teniyamos entre 25 i 30 anyos. Viktor se distingiya kon su fransez impekavle, kon un aksento de halis fransez, i su sentido de umor. Un enverano, oyimos ke se espozo kon una ermoza ijika muy manseva, de 17 anyos, i no lo vimos mas.

En 2005, kuando ya teniya 65 anyos, se avrio un kurso de "Español para Sefardíes" en el Instituto Cervantes de Estanbol. La mujer elegante asentada a mi lado se prezento: “Esti Saul”. Le demandi: “Dime, es ke te espozates en el anyo 1958?” Disho: “Si! Ma komo lo saves?” Le konti, i de akel diya empeso entre mozotras una grande amistad ke me tiene al korason.

Me ambezi komo de vida difisil tuvo Viktor en su manseves, en meldando el livro ke Esti le izo aparejar: Victor Saul, LE LIVRE DE MA VIE.

Viktor nasyo en Kuzguncuk, en 1932. Peryo a su padre kuando teniya un anyo. Su madre kedo sola kon 3 ijos i se fue ande su ermano, a Paris. Ayi, kon el ayudo de su ermano, engrandesyo sus kreaturas en lavorando komo kuzendera de konfeksion. Los 3 ijos se ivan a la eskola publika, enfrente de sus kaza.

En 1938, djusto antes de la Gerra, su mama se fue al Konsulato de Turkiya para renovelar sus pasaportos. I les salvo la vida!

Kuando se deklaro la Gerra en 1939, arrekojeron las kreaturas i las yevaron al Chateau de Brasse. Viktor teniya 7 anyos, En 1942, pudieron reunirsen kon la mama i los ermanos en Paris. Komo Judyos Turkos, no yevavan la estreya amariya, porke el Konsul de Turkiya no aviya akseptado ke sus sivdadanos la yeven. En 1944, resivieron un mesaje del Konsulato Turko diziendo ke no ivan a pueder mas protejarlos, ke tornen a la Turkiya si keren. Entonses la mama vendio todo lo ke teniyan en Paris i tomaron el tren ke teniya un vagon apartado para los Judyos, kon el kresiente i la estreya de la bandiera Turka ke probablemente los salvo.

Viktor teniya 11 anyos kuando tornaron a la Turkiya. Se refujiaron ande un tiyo asta ke pudieron topar un lugar para bivir. Viktor no saviya el turko. Estudyo le elektronika de Ecole Centrale de TSF de Fransia por korrespondensia. Despues de lavorar ande Burla por 2 anyos, avrieron sus proprio atolye de elektronika kon su ermano Beno.

En 1959, konosio i se enamoro de Esti. Se kazaron el 25 de Desembre de 1960 i bivieron unidos i orozos por 60 anyos. Esti mos konta ke kada noche de Shabat, le trayiya un buketo de rozas koloradas. Tuvieron 2 ijos, ke izieron estudiar en las mijores eskolas.

Los dos, marido i mujer, tuvieron una vida sosial muy aktiva, tomando parte en aktividades de bienfezensia, lavorando en Matan Baseter, el Ospital Orahayim, ande Viktor fue Kapo del Komite de Administrasion, dando konferensias en varias Asosiasiones.

Viktor siempre fue admirado por su amabilidad, su djentilmanlik, intelijensia, simplisidad i sentido de umor, i el fransez perfekto ke avlava, mismo despues de tantos anyos de salir de la Fransia. Mos va venir a mankar muncho...

Güler Orgun

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR