UNA ISTORYA DE TU BI´SHVAT

Metin DELEVİ Judeo-Espanyol
19 Ocak 2022 Çarşamba

En 1943, un arvole de arche (akçaağaç) fue introduzido en kontabanda al getto de Terezin. Una ijika ke aviya ayudado a plantar este arvole aviya eskrito:

“Aviya trez kozas ke los Nazis no pudyeron tomar de mozotros: No pudyeron tomar el syelo blu. No pudyeron aretar la luz del sol ke entrava en muestro patyo, i ke mos alimentava i muestro arvole. Sovre todo, no pudyeron aleshar Muestro Dyo ke estava syempre en muestros korasones”.

En el otonyo de 1941, a ochenta kilometros de Praga, en la forteresa de Terezin, los Nazis establesyeron un getto administrado por los SS i aryento, dirijido por un Konsilyo Djudio. Malgrado ke Terezin paresiya mezmo a otros gettos, el fue un eksperimento uniko, de una parte para provar la ajenda nazi para la izolasyon, persekusyon i a la fin, la eliminasyon los Djudios de Evropa, de otra parte fue uzado komo el "getto model" para las vijitas de la Kroche Kolorada Enternasyonal, enganyandolos para ke kreyan ke el getto no era mas ke un elemento para protejar el objektivo Nazi de una sosyedad “limpya“ de elementos no dezeados.

La ambre, las hazinuras i la dezesperasyon diktavan la vida kotidyana. Malgrado ke las deportasyones eran una realidad kontinual, syertos voluntaryos se dedikaron a asegurar momentos sinyifikativos i afilu alegriyas para los chikos i las famiyas. Komo en munchos gettos, los Djudios de Terezin izyeron todo el posivle para kontinuar kon las aktividades edukativas i kulturales. Famozos artistos i maestros davan lesones a las kriyaturas i los enkorajavan a meldar, desinar i eskrivir. Los chikos aziyan teatros i teniyan un periodiko. Las lesones klandestinas inkluyeron despues la erensya i relijyon djudia.

Los lideres del movimyento sionista enspiraron i ambezaron a los detenidos sovre el orgolyo de su identidad djudia. Ansi, los esforzos para retener su umanidad se desveloparon kontinualmente, desde las artes asta los periodikos i las operas, malgrado ke un grande nombre de personas entravan a i saliyan de Terezin, mas de 50,000 djudios ke biviyan kon un espanto kontinual de ser deportados al Este verso los sentros de eksterminasyon Nazis. Segun las statistikas, pasaron 141.000 personas; 33.456 muryeron en el getto, 88.202 fueron deportados; 16.832 fueron liberados en 1945.

Irma Lauscher era una de las maestras voluntaryas en Terezin. Eya teniya i partajava un grande amor por las tradisyones i fyestas djudias. En Enero de 1943, Irma para dar un poko de moral, desidyo de organizar una selebrasyon de la fyesta de Tu B'Shevat, el Anyo Muevo de los arvoles de la tyerra de Israel. Eya le dyo a “komer” a uno de los guardias chekos para ke pase en kontrabanda un arvoliko al getto, lo yevo adyentro de su chizme i lo agrandesyo endjuntos kon las kriyaturas.  Organizo una seremoniya de bayles i kantes kon los chikos del getto, i plantaron el arvole i lo arrozaron kon sus rasyones de agua. Lo kudyaron el arvole, eskrivyeron poezias sovre el i lo desinaron. Lo yamaron Etz Hayim, el Arvole de la Vida.

De los 15.000 chikos ke fueron enkarselados en Terezin, solo sovrebivyeron 150. Despues de la gerra, Ela Weissberger era una de los pokos ke sovrebivyeron i ke tornaron a Terezin para topar el arvole dainda bivyendo. Trasplantaron kon atansyon el arvole al lado del krematoryum i metyeron una plaket kon los byervos del profeto Isaiah: “Komo los dias de un arvole seran los dias de mi puevlo”.

Se eskrivyo un poema dedikado a Etz Hayim, ke se pujo 18 mt. de altura.

Torni a kaza aki a Theresienstadt.

Esto de guardya aki en esta kolina

por este arvole ke se move

myentres el sufla los nombres de los chikos

para mi..  todas las noches

sorvelyamos este lugar. Este arvole i yo.

Sorvelyamos por los chikos de Theresienstadt.

Dainda oyemos sus kantikas.

Shhh-hh-h..  estas oyendo?

Estando en Terezin, Ela djugo en Brundibar, una opera para chikos ke despues fue prezentado en todo el mundo, en syertos lugares kon Ela komo envitada spesyal. En 2001, en Tu B'Shevat, Ela i los aktores de la Opera de Cincinnati sembraron un arvole de arche komemorativo en los terrenos del Hebrew Union College para onorar los chikos de Terezin. Kuando Ela Weissberger deskuvryo ke las inondasyones destruyeron en grande parte los kampos de Tchekiya i arankaron el "arvole de los chikos" en Terezin, se akodro de las semyantes ke un estudyante de HUC aviya trayido de Terezin i, yena de esperanza, demando si era posivle ke unas de las semyantes dainda biviya. Mirakulozamente, las semyantes estan kresyendo en una inkubadora en el Konservatoryo de Cincinnati Krohn i kontinuan a bivir.

Transladado i adaptado libramente de https://www.holocaustandhumanity.org/education/online-exhibits/faith/tu-bishvat/

Siz de yorumunuzu yapın

Tüm Yorumları Görün