RAISES DEL ANYO MUEVO

İsak ESKİNAZİ Judeo-Espanyol
19 Ocak 2022 Çarşamba

En la antikuedad, el anyo muevo se selebrava según la jeografiya i según la astronomiya. En Ejipto, el anyo muevo era el diya ke el rio Nilo  debordava. En el Medio Oriente, en los diyas del ekinoks del otonyo, es dizir, finales de Septiembre, o de  primavera, el mez de Avril. Los Persos selebravan en el ekinoks de  primavera; en la Gresya antigua, la selebrasyon se aziya en el solstis del invierno, es dizir finales del Disembre.

El dokumento mas viejo ke tenemos, es la selebrasyon en Babilonya ke durava onze o dodje diyas i ke se yamava la fiesta de Akitu. Una fiesta kon bayles i kantes para alavar la natura ke ya empesava a renaser en primavera. No olvidar ke según la Tora, el anyo muevo deviya de empesar en el mez “Nisan”, ke es la primavera.

El primer diya del anyo del kalendaryo Gregoryano, lo devemos a Jul Sezar ke kijo empesar el anyo muevo en el solstis de invierno i dyo el nombre del dyo Janus a este mez. Janus es el dyo del empesijo, del final, del transito, de la dualidad. Janus tyene dos karas. Una ke  mira delantre, i la otra ke mira detrás. January en inglez, Janvier en fransez, Enero en espanyol, vienen del nombre  Janus.  Kon las  dos karas, reprezanta también el anyo ke paso i el anyo ke vyene.

Los Romanos kreyiyan ke si el primer diya del anyo pasava orozo,  todo el anyo deviya de pasar orozo. Por esto en este diya se davan regalos unos a los otros, se bezavan, se abrasavan, selebravan este diya adornando las kazas kon ramas vedres de arvoles de pino, aziyan pransos grandes, se engleneyavan kon djugos de dado. Todas estas kozas, lo savemos según lo ke eskrivyo el famoso Ovidius en su livro “Fasti” ke es la deskripsyon de las fiestas.

Oy kreyo ke no estamos muy leshos de Ovidius en tema de selebrasyon del anyo muevo. Kaminos de leche i miel para un anyo muevo , kon esperansa de un universo yeno de inovasyones para la pas i el buen estar de la umanidad.

Fuente :  E.Bingol

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR