EL ANYO MUEVO

Forti BAROKAS Judeo-Espanyol
19 Ocak 2022 Çarşamba

Antes unos kuantos mezes del anyo muevo, ya empesan buenas oguros.

“Ayde en el anyo muevo inshalla todo se va azer bueno, ke venga kon sanedad, ke venga kon alegriya, ke se eskape esta pandemiya, echos buenos i azlaha, kon sanedad, kon todos djustos, ke desho ke tomo”…

El anyo muevo ya vino, el un mez ya se esta indo, nada no se izo bueno. Ya es verda ke pujaron las mezadas ma ke vale. El pasharo se bolo, de sorte ke todo se bolo kon el endjuntos. Seya la gazolina, seya los marketes, mezmo los bazares estan mas karos de los fruteros, la pandemiya se selo del dolar i eya pujo… kon ken avli para ogurar el anyo muevo, ken eya, ken el marido, ken el ijo u el inyeto estan CORONA. En kada kaza uno u dos hazinos. La ekonomiya no se kere dicho. Los mansevos estan penseryozos, kon sus razones estan pensando a sus ijos, las eskolas byen karas, kualo se van, kualo no se van, el gaste esta en su lugar. Agora vash a dizir “ya mo lo karadeates”! Tenesh muncha razon ma de las verdades no mos puedemos fuyir. Yene pensaremos bueno i diremos “todo se va azer bueno”.

Agora un poko riyeremos.

En una sivdad de la Espanya, un alhad demanyana, en una eglisya aviya una seremoniya relijioza. Fina el Papa vino del Vatikano. A la salida de la seremoniya, atiro la atansyon dos sedakeros en la puerta de la eglisya demandando sedaka. El uno teniya una tabela delantre eskrivyendo “YO SO KRISTYANO”, en el otro sedakero “YO SO DJUDYO”. Por siguro los ke estavan entrando i salyendo a la eglisya le estavan dando al ke teniya eskrito “YO SO KRISTYANO. De sorte ke el kuti del kristyano estava yeno de moneda, el kuti del otro vaziyo.

Un buen de sinyor se adjideyo de el ke teniya eskrito “yo so djudyo” i le disho:

--- Ombre! Ser onesto es muy ermozo ma no es buena idea de demandar sedaka en la puerta de una eglisya kon una tabela eskrivyendo “yo so djudyo”. Mira al de allado de ti ya se le incho el kuti de moneda, tu no tyenes ni un grosh. Yo si so de ti…..

El djudyo mas no pudo rezistir, echo la boz al de allado:

--- Salamon! Ya oyites! Mira maredo, a mozos mos kere ambezar komersyo!

Syempre riyeremos.

  

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR