UN KUENTO DE GRUYAS (TURNA)

Eliz GATENYO Judeo-Espanyol
19 Ocak 2022 Çarşamba

Las gruyas son pasharos migrantes. Son migradores de larga distansya.  Su payis es el norte de Eurasia. I en invyerno bolan a la Afrika ke es kayente.

Oy vos va kontar un kuentiziko triste.

Kuando los Amerikanos echaron la bomba atomika a la Japonya, Sadako teniya 2 anyos. En lo ke tuvo 12 anyos entendieron ke tenia “la hazinura negra” por modo de la radyasyon de la bomba. La echaron al ospital ma su estado estava dezesperado.

Todos los doktores del ospital estavan kontando los diyas ke le aviya kedado para bivir. Ma Sadako estava yena de enerjiya. Koryiya en los koridores, djugava i ayudava a otros hazinos.

Entre los hazinos ke ayudava Sadako, aviya una nonika de 80 anyos ke i eya tanbien teniya la mizma hazinura.  La ijika siempre se iva al lado de la nonika i no la deshava nunka sola.

Un diya ke la nonika ya estava a sus diyas dalkavo, le disho a la ijika: “Mira sigun muestra kreensya si una persona puede azer 1000 gruyas de papel, todos sus dezeos se realizan. Yo malorozamente no pude  azerlos, tu aze estas 1000 gruyas i salvate de esta hazinura maldicha.” Estos eran sus biervos dalkavo i peryo su vida.

Sadako estava muy triste ma kon el dezeo de kedar en vida, de bivir,  ampeso a azer las gruyas kon la ayuda del arte de dublar papel japonez, Origami.

Al empesijo los aziya kon alegriya i muy presto, ma kon tiempo ke la hazinura de la ijika avansava, la rapidez ampeso a aminguar.

En primero los jurnales del kazal eskrivieron este haber ma despues lo eskrivieron i los grandes jurnales. Alora ampesaron a mandar syenes de gruyas de las kuatro partes del mundo.  Malorozamente en lo ke eskapo de azer el pasharo 644 serro sus ojos a la vida. Kuando las enfermeras le trusheron los syenes de pasharos de origami, Sadako teniya una sonriza en la kara ma no biviya mas.

Estos pasharos ke yegaron a mas de milyones agora estan en ekzibisyon en un muzeo de la Japonya.

Esta konsejika es la konsejika de Sadako Sasaki ke bivio en los anyos 1943-1955. Sus amigos izieron los 356 pasharos de origami ke estavan mankos i los enterraron kon eya endjuntos.

De akel tiempo en delantre estos pasharos son el simbolo de la pas i del dezarmamiento nuklear.

La vida de esta ijika chika fue eskrito por Eleanor Coerr en el anyo 1977. El livro se yama “Sadako i los 1000 pasharos Gruyas.”

A su nombre izieron una statua de una ijika ke tiene pasharos en la mano.  El padre de Sadako izo donasyones  estos miles de pasharos de origami a los muzeos emportantes del mundo entero. Komo  “El muzeo Truman”.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR