Muestra Komunita Judia se glorifiko i estimo los inombrables lavoros de Bensiyon Pinto

Ke su alma repoze en Ganeden

Esti SAUL Judeo-Espanyol
19 Ocak 2022 Çarşamba

De mi reportaje del pasado:

Estimado Bensiyon Pinto, es una onor de pueder avlar oy kon el.

Puedemos konoser a Bensiyon Pinto, Prezidente Onorario de la Komunita Judia de Turkia?

 Kon plazer, Esti. Nasi en Estambol, el 11 de Oktobre de1936, en Kuledibi (la Kula). Mis parientes son Binyamin i Korin Pinto. Estudyi en la eskola primera Judia "Beyoğlu Birinci Karma" i el liseo fransez Saint Benoit. Ize mi servisio militar en Denizli. En estudiando, lavori en diferentes ofisios para konoser el mundo del komersio. Despues me establesi por mi kuento. El 26 de Novembre de 1961, unimos muestra vida kon mi mujer Eti Pinto. Tenemos dos ijos. So el orozo granpapa de kuatro inyetos. Fui prezidente de la komunita Judia durante 15 anyos, en diferentes periodos, por lo ke siento una grande onor.

Su dono de perseverar, su inisiativa, su abilidad de avlar o adresarse a otros lo izo reushir. Puede kontarmos?

Todo esto es la personalidad del ser umano. Para mi, saver komo adresarse a las personas, avlar o diskutir de kualker sujeto, kon ken sea, en el kadro del respekto, es muy importante.

Las personas, por siguro, deven ser apresiados por sus kalifikasiones. Ma no se deve olvidar ke eyos son personas komo mozotros. Kuando egziste la sinseridad, la konfiensa i la amistad, siempre puede aver dialogo. Si es primer ministro, ministro, o ombre de estado estranjero, para mi es de importansia sigundaria. Lo importante para mi es de transmeterle mis ideas. Esto me parese un poko echo de aptitud.

Puede avlarmos un poko de muestro pais?

Yo so una persona ke ama muncho a su pais. Siempre lavori por el, i vo kontinuar a lavorar. La Turkia es un pais de nuansas. Kon su komunita ancha, sus minoritas relijiozas, sus kulturas diversas, reusho a estar entero, es la prova de la ermandad i universalidad de las tres grandes relijiones; es uno de los raros paizes, komo una dantela, ande  “la kampana, el ezan, el hazan” estan lado kon lado.

La valor la mas importante de la persona Turka, es Atatürk i la Republika ke el fundio. Posedar un ombre de estado de tan grande valor, ke firmo debasho de una reushita apresiada por el mundo entero, es muestro trezoro. Amar i tomar komo egzemplo a Atatürk en kada paso, nunka desharle la mano, komo un komandante, un ombre de estado, un lider, ma mas importante de todo, un ser umano; i engrandeser jenerasiones ke kaminan al lado de el, es lo mas importante para el ser Turko.

Komo pensa valorizar su saviduria i eksperiensas tan anchas, de agora endelantre?

No penso ke tengo saviduria i eksperiensas tan anchas. Kada persona arrekoje eksperiensas en su vida. Yo tuve mazal, pude partajarlas kon los otros. Agora es el torno de los mansevos; porke penso ke es muy importante, ke es un dover, de partajar lo ke bivimos kon las jenerasiones futuras. Yo kumpli mi dover. De agora endelantre, puede solo dar mi avizo sovre la vida, si alguno me lo demanda.

 

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR