KUALO MOS AMBEZA TU BISHVAT

Dora NİYEGO Judeo-Espanyol
19 Ocak 2022 Çarşamba

Tu Bishvat, el Anyo Muevo de los arvoles, esta kayendo lunes el 17 de enero de este anyo. Es kostumbre de komer frutas, las frutas espesiales de la Tierra de Israel en este dia. Las siete frutas en Israel son: trigo, sevada, uvas, igos, granadas, azitunas i datiles. El sembolizmo de esta fiesta es ke komparamos la vida de un arvole a la vida de una persona. 

Kualo mos ambeza Tu Bishvat?

El arvole ke esta yeno de frutas en enverano, a poko a poko empesa a pedrer sus frutas, i sus ojas en otonyo. En invierno, parese ke ya esta muerto, entero dezmudo. En la primavera, empesa a reanimarse dando frutas muevas, i inchendose de ojas vedres. Komo la vida del arvole, la persona pasa periodas en la vida. Una perioda negra se eskapa, una perioda buena empesa. Esto es parte de la natura del ombre. La persona no deve deziluzionarse. Kale ke sepa ke siempre muevas oportunidades se prezentan en la vida, i el ombre krese de muevo, le viene mueva enerjia para dar muevas frutas komo el arvole de la primavera.

Un otro mesaje emportante mos da el arvole. Si un arvole no resive la kantidad de agua ke tiene menester, i la enerjia del sol, se muere. El ombre es komo el arvole. Kon un buen mantenimiento, no es menester de empesar de muevo para kada objetivo ke keremos realizar. Para ir mas adelantre, puedemos fraguar enriva de las viejas bazas. Tenemos menester de un buen mantenimiento para tener mueva enerjia para kreser de muevo, i no tener dingun danyo spiritual. Devemos de protejarmos para pueder  empesar a luchar i kreser de muevo, sin tener menester de empesar de muevo del empesijo.

Un arvole tiene menester de ser plantado firmamente a la tierra. Akeya vez, mezmo el aire el mas fuerte no le puede dar dingun danyo, sino mezmo un aire chiko lo puede derrokar. La tierra no es solo la fuente ke abzorba el alimento, en mezmo tiempo provecha espasio para ke kreskan las raizes. Lo mizmo, si una persona esta atada a su komunidad, i a su erensia, mezmo si todos los aires fuertes del mundo vienen, i miran a derrokarlo, no lo pueden meneyar de su lugar. La persona tiene menester de una baza, para pueder abzorbar las valores i la moral. En un mundo yeno de negatividad, tenemos menester de un refujio seguro para pueder tornar, i arefreskarmos. El ombre deve de pasar estas valores a sus ijos por la kontinuasion de su erensia.

Otra koza ke mos ambezamos de los arvoles es la pasensia. Un arvole, ke empesa kon una planta chika, tiene menester de munchos anyos para kreser, para engrandeserse, i para dar su fruta delisioza. Komo el arvole, i mozotros devemos de ser pasensiozos, i saver ke todas las kozas buenas, empesan a ‘dar fruta’ kon tiempo, kale asperar.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR