La votasion de la Akademia para determinar los nominados para los Premios Oscar 2022 va empesar el 27 de enero i va eskapar el 1 de febrero. Las nominasiones al Oscar 2022 se van a anonsar el 8 de febrero. Antes ke venga el dia esperado, los espektadores ya empesaron a avlar sovre sus prediksiones para los Oscares. La famoza revista de Cine Variety ya enumero sus prediksiones por el Mijor Filmo para los Premios Oscar 2022. Agora, echaremos un ojo a las prediksiones:
10. West Side Story
El filmo, esta kontando la istoria de amor de una manseva i un mansevo de los Sharks and Jets, ke son dos chetas enimigas de kaye. La manseva i el mansevo son inkapavles de reunirsen. El filmo es una adaptasion moderna de Romeo i Juliet en el jenero muzikal.
9. No Mires Ariva
El filmo esta kontando la istoria de dos astronomos ke estan lavorando para advertir la djente ke un meteorito muy grande va destruir la planeta en sesh mezes.
8. La Trajedia de Macbeth
El filmo se esta sentrando en un senyor. Tres djadis lo estan konvensiendo ke se va azer el rey de Eskosia. El senyor i su ambisioza mujer estan penando para apatronearsen de la korona.
7. Pizza de regaliz
La istoria esta pasando en el Valle de San Fernando en la dekada de 1970. El filmo se esta sentrando en la vida de un estudiante ke tambien es un aktor reushido.
6. Tick, Tick… ¡Boom!
El filmo esta kontando la istoria de un ombre ke se yama Jon, i ke esta biviendo en New York en la dekada de 1990 i ke eskrive kompozisiones muzikales. Jon empesa a kestionarse si izo bueno de tomar la desizion de karrera solo para estudiar artes de shenas.
5. Ser los Ricardos
El filmo es sovre las vidas de Lucille Ball i Desi Arnaz, ke son uno de los duos ke eran los mas populares de la televizion en los Estados Unidos en la dekada de 1950. La istoria esta sentrandose en los viajes profesionales de las komedianas Lucille Ball i Desi Arnaz. El filmo esta tambien kontando komo eskapo sus karreras i sus relasiones.
4. Duna
El filmo esta pasando en un futuro leshano, i esta kontando la istoria de Paul Atreides, ke tiene en la mano el kontrol de la planeta dezertika Arrakis.
3. El poder del perro
El filmo es bazado en la novela omonima de Thomas Savage. El poder del perro esta kontando la istoria de dos ermanos ke posedan una grande granja en Montana.
2. Rey Ricardo
El filmo es sovre la vida profesional de Richard Williams, ke es el padre de Venus Williams i Serena Williams. Venus i Serena son reushidas en el djugo de tenis. El filmo tambien esta kontando le relasion de las dos ermanas kon sus padre.
1. Belfast
El filmo se esta sentrando en la vida de una kreatura i su famiya ke son de la klasa de lavorantes i ke bivieron eventos turbulentos a la fin de la dekada de 1960.
