El 19 de Disembre 2021, dia de Alhad fui envitada a una organizasyon ke aparejo Meri İstiroti, la koordinatrisa de Liv Hospital. Meri İstiroti, una mujer reushida, fue 16 anyos la eleva de Lili Barokas, la duayena del bale de muestra komunidad, i gano munchos ensenyamyentos ke dyeron forma a su vida. A la fin reusho a tomar diferentes sertifikados del Royal Academy i otros ke son sertifikados enternasyonales del bale.
Lili Barokas ke no peryo su pasyon por la vida i su disiplina, inspiro Meri İstiroti a preparar un livro sovre la vida de esta balerina, ke es una de las maestras del bale, una de las mas vyejas ke egziste en muestra republika, mizmo ke antes unos kuantos anyos tuvo un jubile en su profesyon.
Lili Barokas kontinuo esta profesyon i arte durante 77 anyos, amelyorando syempre a si mizmo, eduko syenes de estudyantes. La edukasyon del bale ke era muy freska akel tyempo en la Republika Turka, se dava unikamente en el Konservatoryo del Estado de Opera i Bale.
Meri preparo un salon bastante grande, ande aviya fotolyos para asentar, todas las fotos de Lili en las paredes, kon su marido, azyendo bale, ensenyando sus elevas, ke elegansa!... Un salon kon rozas i un kokteyl kon bevyendas, dulsuryas i kozas saladas. En frente, delantre de una meza, Lili kon Meri, vistidas muy shik asentadas, kon rozas multikolores enriva la meza i un montante de livros. Todos asperando kon sira para ke Lili sinye el livro al nombre de los ke estan asperando. Una partida komyendo, otra konversando i otra partida eskrivyendo al livro de rekuerdos.
El Prezidente de la Komunidad Djudiya, İshak İbrahimzadeh, El Prezidente del Muzeo, Silvyo Ovadya i el Vise Prezidente, Moris Levi onoraron este dia reushido.
La seremoniya de sinyar sureyo kaji una ora i medya. Despues, mos tomaron a un salon grande para ver el filmo dokumental ke preparo Alberto Modiano, un filmo ekstraordinaryo de la vida de muestra balerina famoza.
Antes del filmo Meri İstiroti izo una avla yena de alavasyones por Lili Barokas i le ofresyo un buketo de rozas. Lili izo una avla muy sentimental i remersyo Meri ke organizo este dia i a todos los ke partisiparon. Estava yena de antuzyasmo.
Kuando se termino el filmo salimos afuera i aya, todas las elevas de Lili se fotografyaron kon sus profesoras, avlando, riyendo i bevyendo kafe.
Lili Barokas, mujer entelijente, sus ojos syempre ekspresivos, yena de enerjiya, tyene una grande eksperyensya de la vida i es muy aktiva. Lili es la primera artista ke kito un livro de bale por las kriyaturas. A parte ke es la duayen del bale, eya tyene munchas kalidades komo djugar el piano, nadar, djugar tenis, azer spor. Kada demanyana kuando se alevanta kale ke aga 20 puntos de bale, despues se va a la pisina para nadar medya ora, vyene a kaza, kome por demanyana. Si la amiga esta dispuesta se va a djugar tenis medya ora, vyene a kaza, toma una dush, kome por midi i sin repozarse sale para merkar lo ke tyene menester, se ve kon las amigas. Es una mujer kultivada, save munchas linguas, aze munchas donasyones a las organizasyones de muestra komunidad, yena de kerensya, tyene respekto, kompreansyon, disiplinada, el dia para eya es organizado kon oras, muy sensible….
Kerida Lili, rogo al Dyo ke estes syempre sana i rezya i ke no peryas nunka esta enerjiya de vida ke tyenes. Tyenes un lugar muy spesyal en mi korason, te kero muncho byen kerida amiga, kerida aliada.
