Nesim Karlıyol
Las konsejikas de Temel son muy savrozas komo Djoha ma Temel es un poko bovo.
La mujer de Temel ya ay anyos ke no puede parir.
Temel torno a kaza del echo, la mujer kon guste lo abraso a su marido i le disho
ke un mes ya tadro i kontuneyo:
"Me parese ke kedi prenyada, aminyana me va ir al doktor, de agora a dingunos no se lo dizeremos".
Temel a la demanyanika se alevanto kon muncha alegriya i se fue al echo.
Por la otra parte, ya ay un mez ke no pagan la fatura de elektrik.
El kontrolor de elektrik vyene a kaza i chafteya a la puerta.
La mujer avre la puerta. El ombre le dize: "Ya savesh ke un mez tadraron, ya savesh".
La mujer ya se charpeyo! "Vozos de ande lo savesh?"
"Aki en el defter esta eskrito"!
"Komo puede ser, kuando lo eskrivitesh?" disho i kontuneyo la mujer:
"A la noche se lo digo a mi marido."
A la noche, kon espanto se lo konto al marido, el marido kon muncho inyervo se alevanto la demanyana, se vistyo i se fue direktamente a la administrasion de elektrik.
Entro no entro, empeso a gritar: "Ken es el ke vino a mi kaza i a mi mujer le disho ke tadro?"
Los personeles disheron: "No te inyerves, no es koza grande, solo vas a pagar un poko de djeza."
El ombre kon mas inyervos disho, "Kualo i djeza va dar por esto, i si no pago?"
"Te la kortamos!"
"Kualo loko sosh, mi mujer kualo va azer akeya vez?"
"No se" disheron i kontuneyaron: "I EYA KE SE PASE KON KANDELA"!
