Peryimos a un gran artista, Selim Hubeş

Karen GERSON ŞARHON Judeo-Espanyol 1 yorum
22 Aralık 2021 Çarşamba

En los 45 anyos ke fuimos amigos intimos kon Selim Hubeş, nunka lo pude konvenser ke era un gran artista, yeno de kreatividad, yeno de ideas maraviyozas, yeno de saviduriya i de gozo. El konosiya a muestro puevlo muy muy bien porke era muy obzervante i siempre viya el umor en las kozas. Ama nunka aksepto ke era un artista i esto me inyervava muncho porke si Selim no era artista, ke era? El kompozo tantas kantikas maraviyozas en Judeo-Espanyol i en Turko ama nunka aksepto ke eran ermozas! La Romansa de Rika Kuriel, ke es una de las mas ermozas kantikas en el mundo, no kijo ke la tomemos al repertuar de Los Pasharos Sefaradis, porke para el no era bastante buena! Es una noche, en un konserto ke dimos en el Göztepe Kültür Derneği, ke le izimos un faite accompli a Selim i la kantimos i la djente se ennamoro pishin. Desde akeya noche de anyos antes, esta kantika se izo un "hit"!

Un amigo de 45 anyos, no es kolay de akseptar su piedrita. En los anyos ke estamos endjuntos en el grupo, Los Pasharos Sefaradis, mos viamos muy al kuruto i siguro ke pasavamos dias i noches endjuntos en los viajes ke tuvimos para dar konsertos en el mundo entero. Era un plazer grande estar endjuntos, kaminar, komer i bever, riyir i burlar en estos viajes. Pasimos una manseves una maraviya. Selim era una persona ke no mirava a las kozas muy pozitivo. Siempre me diziya, "tu sos Polyanna, las kozas nunka son tan buenas" ama yo perseverava. El nunka kreia ke mozotros ivamos a pueder viajar para dar konsertos kon muestro grupo i se burlava de mi kuando le diziya ke mos ivan a invitar al estranjero! Mizmo kuando ya fuimos invitados, siempre asperva a ke las kozas no vayan bueno: no mos ivan a resivir del aeropuerto, no mos ivan a yevar a un otel bueno, no les iva plazer muestras kantikas, ets ets.

En eskriviendo estas linyas, me esto akodrando de tantas i tantas memorias maraviyozas! Sus mimikes kuando no le plaziya una komida (no le plaziya muezes por egzempyo!), su amor por komidas de berendjena, su amor por merkar mas i mas instrumentos de muzika kuando mos ivamos en viaje i komo los eskondiamos para ke no los veya su mujer, Rozet i ke se inyerve porke ya no le kedava lugar para meterlos en su kaza, su amor para koleksyonar kozas komo periodikos, pipos, tespihes, CDs, i livros i livros. Tiene una kaza ande biven solo estas todas koleksyones i eyos, marido i mujer, tuvieron de moversen a otra kaza porke no les kedo lugar!

Selim era una persona ke izo munchas buendades a munchas personas i esto lo aziya sin ke sepan dingunos, reelmente "matan baseter"! El se andjideava de personas sin mazal i aziya todo lo posivle para alivyanar las vidas de los dezmazalados. Tuvo muncho zehut en su vida.

Selim toko a las vidas de muncha djente. Era el ke dava ideas para realizar showes en el Dostluk. Desde ke lo konosi ke tenia un gran interes en el teatro. Tenia sienes de ideas kreativas i kuando estas ideas se realizavan, teniyan un sukseso fenomenal.

Muestro dalkavo viaje kon Selim fue a Israel en 2018, kuando mos fuimos a djugar la piesa KULA '930. Era el 40en aniversaryo de la piesa, i komo siempre, kuando estavamos el grupo entero endjuntos, pasimos unos dias maraviyozos.

Selim era uno de mis mijores amigos, era un ermano kaji i su piedrita me toko al korason. Es para mi una dolor inimajinavle de pensar ke no esta mas en este mundo ama esto sigura ke ande esta, los estara engleneando aya en Ganeden! Ke estes orozo i gustozo ande estas mi kerido amigo!

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR