Deke Metaverse va tomar el lugar del internet en el futuro? El konsepto Metaverse va salir de los romansos i filmos de siensya fiksyon, despues de un tyempo no muy largo i se va enstalarse en muestras vidas.
Este konsepto va ser sin limito i siguro va tener partes eskuros, esto supozando.
En el mundo teknolojiko, en estos tiempos dalkavo, lo mas se esta avlando de este sujeto. I lo mas enteresante, esta nosyon va kontener djugos, arte, finansas i finalmente teknolojiya 5G ke es la mas adelantada teknolojiya oy i munchos artikolos. Metaverse en el futuro va tomar el lugar del Internet.
Este sujeto empeso kon un romanso de siensya fiksyon, komo un mundo de imajinasyon verdadero. El livro fue eskrito de parte de Snow Crash en el anyo 1992 i despues del filmo “Ready Player One” fue tomado en mano para realizar el konsepto. Desde el anyo 2021, el fondador i el CEO de la sosyedad Facebook, Mark Zuckerberg deklaro ke la sosyedad Facebook se va azer una kompanyiya Metaverse i despues deklararon ke achakes de este trokamiyento de vizyon, la produksyon de estos enstrumentos van a ser echos de parte de la kompanyiya ke va ser nombrada “Meta”, kere dizir ke va ser un trokamyento muy grande.
En kurto, Metaverse va ser muncho mas verdadero, del mundo imajinario i del Internet.
En el kontenido de Metaverse imajinario i verdadero, no se va pueder azer definitivamente diferensya entre los dozs. A la verdad pujada u al mundo imajinario augmentado. Se va pueder entrar kada punto de kualkyere lugar.
Los mundos imajinarios i verdaderos van a estar uno aryentro del otro. Por las oras, este konsepto se esta avlando muncho ma dainda esta en supozisyon i la baza teknolojika no esta enteramente pronta para realizarlo. La djente solo estan dando sus opiniyones a kualo va pareser Metaverse.
Facebook i munchas otras kompanyiyas teknolojikas, desde un largo tiempo estan lavorando en este mizmo sujeto, komo Microsoft, Epic Games, Roblox i Nvidia.
Si keremos komparar la esperansa del internet del diya de oy, kon el Metaverse del futuro: el internet de oy es un derredor ande las informasyones se utilizan de una parte a la otra.
En Metaverse la information se partaja kompletamente, porke para arivar a los web-sites i los sistemes sosyales en los estrumentos komo computerb, ipad, ets. no se va tener menester.
El muevo sistem imajnario i verdadero se va pueder ver kon antojos spesyales.
En resumen de todo, los filmos de siensya fiksiyon, ke djugaron fin agora se van a realizar.
No kero dizir palavras grandes, porke en el empesijo del komputer i internet, me paresiya ke es impossivle para mi de utilizarlos, ma achakes ke estava lavorando aktivamente, de suyo me ambezi. Puede ser ke i el metaverse lo va utilizar en el futuro.
Vos esto ogurando keridos lektores un avenir mıy bueno i kon muncha felisidad.
