Una eroina de Hanuka

Metin DELEVİ Judeo-Espanyol
15 Aralık 2021 Çarşamba

10 dias antes, eskapimos de fyestar los 8 dias de Hanuka. Syertos asendimos la Hanukiya en muestras kazas. Ma de otra parte, en 2 dias las kandelas fueron asendidas en publiko: el sinken dia en la Sinagoga de Kilis i el ochen dia al lado del Ospital del Or Ahayim. Los dos eventos fueron asistidos de la parte de las otoridades lokales o del governo. Estos dias fueron reelamente inolvidavles.

Oy vos kero eskrivir sovre una eroina de Hanuka, ke poko a poko mos empesimos a olvidar: Yehudit (o Judith a la franka).

No se save kon klaridad kuando tuvo lugar reelmente la istorya ke vos va kontar. La istorya aparesyo por primera vez en un livro muy vyejo ke se yamava kon el nombre de la eroina, Yehudit (Judith), i estava eskrito en Ebreo vyejo. Ma el teksto original se peryo i solo kedo una traduksyon en Grego i se dize ke la traduksyon no era perfekta.

La istorya se konta en diferentes versyones. Segun una versyon, esto afito durante la epoka de la revolta de los Maccabim kontra la opresyon Sirio-Grega i Yehudit era de la famiya de los Hasmonaim.

Ken es Yehudit (Judith)? Eya es la ija de Yohanan (el Kohen Hagadol del tiempo). Eya salvo su sivdad Betuliah (sivdad ke oy en dia no se save egzaktamente ande es) de la destruksyon de las manos del General Sirio-Grego Holofernes.

Myentres ke los Djudios de la sivdad estavan serka de una ambyertura total devido al enserklamento del enimigo, Yehudit disho a los dirijantes de la sivdad ke tenia un plan para entregar el komandante enimigo a sus manos, ma ke no deviyan demandarle nada sovre los detalyos de este plan. Simplemente deviyan tener konfiensa en eya. Savyendo su reputasyon en saviduriya i piedad, los dirijentes de la sivdad fueron de akordo i akseptaron sin kondisyones i preguntas.

Akompanyada de una ayudante, Yehudit parvino a tomar una odiyensa kon Holofernes i le disho ke, por el bien de los ke sufriyan de ambyertura, keriya ke la sivdad kaye. Eya le propozo de informarle en kada dia sovre las komanyas de la sivdad i endikarle el tyempo favoravle para atakar.

Despues de unos kuantos dias, Yehudit i su sirvyente ganaron la konfiyensiya del enimigo i pudyeron entrar i salir al lado de el kuando kerian.

Kuando eya disho a Holofernes ke a la sivdad no le kedo nada de komer i ke va ser un buen tyempo para atakar, Holofernes la envito a su tenta para selebrar. Eya naturalmente aksepto i ensistyo ke el deviya gostar su “renomado” kezo de kavra. Myentres ke el komiya este kezo tan salado, Yehudit le sirvyo su vino fuerte. Kuando Holofernes finalmente kedo durmyendo despues de komer i bever tanto, Yehudit, sin peryer tyempo, le korto la kavesa kon su propyo espada. Las dos mujeres metyeron la kavesa de Holofernes en un sesto i tornaron a Betuliah.

Yehudit konsejo i despues ordeno a los dirijentes de Betuliah de atakar sin peryer tyempo los Sirio-Gregos. Los soldados de Holofernes se espertaron i vyeron los Djudios atakando i la kavesa de Holofernes enriva de un palo. La armada Sirio-Grego empeso a fuyir kon konfuzyon i panik. I ansi la sivdad fue salvada.

Para onorar a Yehudit, en syertas komunidades Djudias egziste la tradisyon de komer kezos durante 8 dias de Hanuka.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR