Fiesta de Hanuka en Balat

Silvyo OVADYA Judeo-Espanyol
8 Aralık 2021 Çarşamba

Este anyo fuimos mas mazalozos ke el anyo pasado. En 2020 solo una noche estavamos en el Park de Fenerbahçe para asender las kandelas de la Hanukiya. Este anyo una noche la asendimos en Kilis (Sivdad vizina a Gaziantep – serka de la frontyera Siriana). Esto va ser el sujeto de mi artikolo de la semana venidera. I noche de alhad, diya dalkavo de la fiesta de Hanuka estavamos en Balat, en el bodre de la mar para asender las ocho kandelas de la Hanukiya. Ocho i no mueve porke no avia dingunos determinados para asender la mueven. Deke en Balat? Djusto en el bodre del Kuerno de Oro porke este lugar era muy emportante para mozotros Djudios Sefaradis ke vinimos de la Espanya de ande fuimos ekspulsados. Este lugar fue el porte ande mos resivieron los Otomanos.  Me disheron ke devia de ser kinze puntos antes en Hasköy djusto en frente del lugar ande se devia de asender la Hanukiya. Suvimos en una barka reynada (Saltanat Kayığı) i pasimos la mar kon esto. El Presidente de la Munisipalitad de Beyoğlu, Haydar Ali Yıldız, El konsul general de Espanya en Estanbol i el Gran Rabino Haleva estavamos endjuntos kon unos kuantos amigos.

   Despues ke vinimos a Balat, djusto al lado del Ospital Or Ahayim avia una djentorya ke estava asperando la seremonia. Apenas ke estava aya me dyeron un papel kon nombres. I devia de ser el responsavle de la segunda kandela kon el ayudante del governador, un responsavle de los echos estranjeros i un alay de konsolatos de Fransia, de la Republika Tchek, de la Suisa, de la Polonya; de la Alemanya, de la Romanya i kreo de otros paizes. Kada anyo es muy difisil de anunsiar los ke van a partisipar a asender la kandela. Porke la djente esta aziendo la orasyon de Hanuka en estos puntos.

  Aviya un asistente de ministro, una deputada, syertos presidentes de munisipalidades, munchos reprezentantes de komunidades sivil, munchas personas i mansevos de muestra komunidad.

  Es İlker Franko ke mos prezento la nochada. Despues ke munchas personas tomaron la palavra, tuvimos el plazer de segir el konsyerto de los Pasharos Sefaradis. Mos kantaron buen karar de kantikas enpesando por “Estanbol mi Amor”, un potpouri ande kantaron unas kuantas kantikas i la kantika ke le plaze a İzak İbrahimzadeh, el prezidente igual de muestra Komunidad: “La Romansa de Rika Kuriel”. Reelmente es una kantika maraviyoza ma no so de la mizma opinion para meter en el rekorder del Gran Rabinato. Devesh de oyir esta kantika kuando estash asperando uno o una al telefon. Es una romansa muy triste i no deve de ser la kantika del telefono. Kreo ke es en el 1990 o 1991 ke tuve la okasion de segir Los Pasharos Sefaradis kon Selim i Yavuz Hubeş en Strasbourg kuando dyeron un konsyerto. Era el anyo ande Selim kompozo esta kantika sovre la poezia de Avner Perez.

   Despues ke se asendyo las mueve kandelas todos los ke partisiparon estavan kontentes. I fui el solo ke torni atras a Hasköy kon la barka reynada, porke teniya aya la araba.

   Kero rengrasyar a los prezidentes igual, İzak İbrahimzadeh i Erol Kohen de muestra komunidad ke organizaron una nochada asemedjante.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR