EL UMOR JUDYO

Dora NİYEGO Judeo-Espanyol
6 Ekim 2021 Çarşamba

El umor judyo se burla de munchas kozas, de la vida de los judyos, del antisemitizmo, de muestro amor por paras, del komersio, de la relijion, de muestras tradisiones, de la madre judiya, de la famiya judiya, de munchas kozas ke mos enteresa.  Mezmo, munchas vezes mos aze riyir de las situasiones ke son de yorar.

El umor judyo es muy tolerente. Tenemos munchos kuentos ke kritikan mezmo muestra relijion. Mozotros, en los kuentos, kritikamos solo los judyos, ma nunka no mos burlamos de las otras nasiones. Por egzemplo, no kritikamos el komporto de los Nazis kontra los judyos, ma mos burlamos del komporto de los judyos kontra los Nazis.

- Es el tiempo kuando los Nazis empesaron a arekojer a los judyos, para yevarlos a los kampos de konsantrasion. Moshe esta biviendo en Berlin. Un diya, un ofisye alman lo areta en la kaye, i lo forsa a komer lo suzyo de un kavayo. Moshe no tiene remedyo, se aboka, i empesa a komer. Del gusto, el ofisye se mete a riyir; tanto se riye ke el fuzil le kaye de la mano. Presto, Moshe apanya el fuzil, i le dize: ’Agora es el torno tuyo de komer este suzyo’. El ofisye no tiene remedyo, se aboka, i se mete a azer lo ke dize Moshe. Antes ke vengan otros, Moshe echa el fuzil de la mano, koryendo se fuye de aya. Kuando viene a kaza, Rashel le dize: ‘Deke tadrates este karar Moshe? Kedi en mirikiya’. ‘Endivina veremos Rashel, saves kon ken komi este midi?’

Mezmo ke nasyo en un sentro relijyozo, el umor judyo es muy tolerente. Los judyos amostran grande tolerensya mezmo por la relijion.

Lo mas esansiel de todo en los judyos, es la famiya. La madre i el padre judyo azen todos sus puederes para ke sus ijos adelanten. Lo mas la madre judiya. La madre judiya (komo dizen yiddishe mama en la literatura), es mas fuerte del padre, i le pasa mas muncho la palavra kon los ijos.

Mme. Kohen lo embiya al ijo a la Amerika, para ke estudye en la universidad. Pasa un tiempo, un diya el ijo le telefona:

- Mama, yo deshi la eskola

- Bueno pasha.

- Me kazi.

- Bueno pasha

- Tomi una mujer kristiana

- Bueno pasha

- Me nasyo una ija

- Muy ermozo pasha

- Estamos vinyendo a verte

- Muy bueno pasha

- La estamos trayendo i a mi esuegra

- Muy bueno pasha

- Mama, mos vas a apartar una kamareta para kada uno?

- Si pasha

- Bueno, i tu, ande te vas a echar?

- I yo me va echar de la ventana! 

Los kuentos de politika son muy popular.

Ibrahim Reis le telefona a Biden dizyendo ke tuvo un esuenyo, ke tanto lo alegro, ke no se pudo detenerse de telefonarle.

- En mi esuenyo, los Estados Unidos se aviyan konvertido en un payis muzulmano. Las karas de las mujeres estavan serradas kon velos. Todos teniyan el Koran en la mano, i paresiyan muy orozos. Enriva de pankartas estava eskrito ‘Bienvenidos a los Estados Unidos de Iran’.

- I yo, djusto me estava aparejando para telefonarte’, le dize Biden. ‘Un endivino me vijito el otro diya. ‘Sinyor prezidente, me disho, esto viendo en la agua, un grande payiz muy leshos.. La djente estan kantando, baylando en las kayes. Los ombres visten shortes, i kamizas aviertas. Las ijikas kon dekoltes, i fostanes mini. Ke esto viendo, las mujeres estan kemando los velos de la kavesa.  Todos tienen pankart en la mano.

-Ke esta eskrito en las pankartas?

-No se, esta eskrito en ebreo!

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR