La Istorya de los Judios de Afganistan

Dora NİYEGO Judeo-Espanyol
9 Eylül 2021 Perşembe

Los judios tuvieron un pasado riko en Afganistan.  La istorya de los judios afganes empeso en el anyo 900. Los Durranis, los Yussofzos, i los Pastunes estan reklamando ke eyos son de las diez tribus pedridas. Los Pastunes tienen nombres judyos komo Asher, Naftali, i tienen kostumbres judyos. Por egzemplo se kazan debasho la hupa, azen berit a los ijos, ocho diyas despues del nasimiento.
En el sieten i ochen siglo, los judios ke se fuyeron de Persia vinieron a Afganistan. En las kaves del norte de Afganistan, los investigadores toparon dokumentos eskritos en judeo-persiano. Estos dokumentos estan amostrando ke los judyos izieron aktividades komersiales en la parte afgana del Kamino de Seda.
En el diezen i onzen siglo, la populasion judiya de Afganistan era entre kuarenta mil i ochenta mil. Los judios aziyan komersio de kuero i viyajavan entre Afganistan, Iran, India, i Asia Santral.
La populasion judiya aminguo despues la invazion de los mongoles en el anyo 1222. La populasion pujo de muevo en el kinzen siglo, kuando los judios empesaron a briyar de muevo en el komersio entre Afganistan, India, i la rejion del Golfo Persiano.
En el anyo 1839, los Persianos empesaron a forsar los judios a konvertirsen. Miles de judios se fuyeron a Afganistan. La populasion judiya pujo de muevo a kuarenta mil. El norte de la sivdad Herat, ke es agora la tresera grande sivdad del pais, era el korason de la mueva komunidad judiya. Aviya kuatro sinagogas en la sivdad. Las dos fueron konvertidas a mishkitas. La una se izo eskola, i sentro kultural. La sinagoga Yu Aw tiene dainda enskripsiones ebreas en las paredes, i ruinas de una mikve. 
En el anyo 1970, el antisemitizmo en Afganistan forso los judois a emigrar a los paizes vizinos. Uvo grandes pogromes en los sentros prensipales de Maimoni, i Herat. Judyos fueron ovligados a pagar dasyos altos, i a servir en las fuersas de la armada.
En el anyo 1927, la populasion judiya abasho a sinko mil. Entre los anyos 1929-1933, en el tiempo del governo del rey Nadir Shah, Nadir les dio derechos iguales komo los otros sivdadinos.
Kuando el rey fue asasinado, i ke la propaganda de los Nazis empeso en el pais, uvo mas munchos pogromes en Herat, i Kabul, i metieron duras leyes ekonomikas a los judyos. Los judios empesaron a fuyirsen afuera del pais, i los ke kedaron fueron forsados a bivir solo en las sivdades de Herat, Kabul, i Balkh.
La majorita de la populasion judiya abandonaron Afganistan despues del anyo 1960. Munchos se fuyeron a Israel, otros se fuyeron a New York, i a Evropa. Oy, mas de mil judios afganes, i sus ijos biven en Queens, New York.
La vida judiya en Afganistan parese a la vida de Persia. Tienen los mezmos kostumbres. La komunidad judiya de Afganistan tomo munchos kostumbres de sus vizinos. Se kitavan kalsados antes de entrar a la sinagoga. Las mujeres de los lideres de la komunidad judiya vistiyan una burka blu. Las mujeres muslumanes vistiyan burka blanka. Las sinagogas afganas fueron enfluensadas de la arshitektura de las mishkitas.
Oy, solo un judyo kedo en Afganistan, Zablo la Simintov. Simintov bive en Kabul en el etaj ariva de la sola sinagoga ke kedo en el pais. Su famiya emigro a Israel. Simintov esta biviendo solo en su kaza. En estos dias ke ay problemas en Afganistan, se fueron a tomarlo, ma no kijo tornar a Israel.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR