La emportansiya de sembrar vedruras i frutas

Silvyo OVADYA Judeo-Espanyol
1 Eylül 2021 Çarşamba

   La semana pasada vos konti lo ke devo de azer kada alhad. Esta semana estava envitado a dos bodas en la Sinagoga Neve Şalom. La  primera era el ermano de muestra Emel Benbasat i la segunda, la ija de mis amigos Verda i Rafi Habib. Mirella asta ke reusho a kazarse, troko tres vezes de data porke kada vez tuvyeron un problem kon esta korona. Les auguro una vida yena de felisidad.

   Avlando de la Korona muestro Kemal ke lavora los 35 anyos dalkavo en el Şalom fue hazino malgrado sus dos vaksines de Biontech. Avlimos en primero noche de Alhad i despues lunes. Teniya mas de 39 grados de kayntura. I despues empeso a titredear. Le embiyimos una Ambulans i ay 7 dias ke esta en el ospital. Kuando estamos avlando esta bueno. Ma kuando miran sus pulmones tyene syertos problemes. Reelmente ke es una hazinura kon un alay de problemes.

   Despues ke el klima se normalizo, tenemos solo unos kuantos fuegos i las inondasyones se kalmaron. Agora tenemos problemes kon los presyos de las vedruras i frutas. Dizen ke esto todo fue la razon de la ogmantasyon de los presyos de todo modo de vedruras i frutas mizmo si no es la razon.

   Estamos vyendo estos anyos dalkavo ke en muestro payis komo no tenemos un program para la sembradura de todo modo de koza kada anyo bivimos la penuria de syertas vedruras o bakliyates. El anyo pasado munchos sembraron pipinos i no reusheron a venderlos. Por esta razon este anyo disheron ke no deven sembrar pipinos i sembraron otra koza; i esta semana el presyo pujo a 10 liras (1,25 usd). El presyo era 4-5 liras unas kuantas semanas antes. En Turkiya ken sembre vedruras? Los kazalinos. I si dingunos les da ideas i les ayuda, sembran lo ke es el mas kolay para eyos sin pensar muncho. Kuando no reushen a vender lo ke sembraron empesan a pensar lo ke deven de sembrar el anyo venidero. Devemos de saver ke sembrar vedruras i frutas no es mas solo el echo de los kazalinos. Ma komo los governos no dan grande emportansa a esto, no tenemos un program nasional para esto todo. Oy es la moda de tener terenos kon arvoles de muez i de almendras. Unos kuantos anyos ke no tuvimos muezes en los arvoles de muestro payis, importaron de las Amerikas i del Shili muezes kon konteyneres. Dos anyos antes estavan vendyendo a 20 dolares el kilo.

   Kuando estudyimos en la eskola primera (1961-1966) meldavamos en los livros ke la Turkiya era un payis ke era kapache de sembrar todo lo ke tyene de menester. Ma kreo ke oy en dia no puedemos dizir la mizma koza. Ay anyos ke merkamos una partida del trigo de otros paizes, i ay anyos ke vendemos una partida del trigo. Es la misma koza para el turnesol. Ay anyos i anyos.

Para los ke no saven esta istoria vo la kontare. Antes no se sembrava turnesol en muestro pais. I no se konosia. I un merkader de Edirne vido en los Balkanes ke estavan sembrando una roza amariya i demando lo ke ez. I se ambezo. Era un merkader muy djusto i korekto. I el sinyor Izak Duenyas (padre del famozo mediko de kriaturas Avram Duenyas) arekojo un grupo de kazalinos i les ekspliko lo ke devian de sembrar. I el les prometio de merkar todo el produkto. I se realizo de esta manera. I merko todo el produkto i empeso a produzir azete de turnesol en Estanbol. I mizmo oy en diya el turnesol es un produkto ke se sembra en munchas partidas de muestro payis.

 

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR