Sovre el livro “Los Itinerarios Sefardis”

Silvyo OVADYA Judeo-Espanyol
23 Haziran 2021 Çarşamba

  Dos evenimyentos sovre este sujeto me emosyonaron muncho. El primer fue en Mayo 2019, kuando estavamos en un semposium en Seattle. Aya tuvimos la posibilidad de partisipar a una konferensia ande el famozo Dr. Devin Naar era el ke mos konto munchas kozas sovre la Koleksion de las investigasiones sovre los Sefaradis ke se topa en la universitad de Washington/Seattle. En la misma epoka en el “Kültürel Mirası Koruma Derneği - Asosiasion sovre la Konservasion de la Erensia Kultural”, ke es una asosiasion nasyonal ke lavora sovre todo modo de sitios i edifisios istorikos de muestro payis i ke las otoritades o las fondasiones enteresadas no se enteresan, estavamos realizando un proyekto sovre la Isla de Marmara ande biviya una Komunidad Djudia. Mizmo oy en dia se topan syertas kazas ke los proprietarios eran djudios. I esta asosiasion izo un lavoro sovre la arkitektura sivil de las Islas de Marmara. Viendo el trezoro ke egziste en esta universitad i en este sentro keriya organizar una ekspozisyon - a lo manko de fotografias - en la Isla de Marmara. Ma malorozamente no resivi dinguna repuesta del Doktor Devin Naar.

 El segundo era la eksopozision ke se devia de realizar sovre Seattle por el Sentro ANAMED. Mizmo Nisya Allovi del Muzeo Djudio d’Estanbol les avia ayudado - porke la estavan rengrasyando; ma mos disheron ke la ekspozision no se esta realizando finalmente. Dos mezes antes oyimos ke un livro intitulado “Los Itinerarios Sefardis” fue publikado por el mismo sentro en turko i en inglez (este livro esta vendido en el sitio de internet del Sentro Sefardi d’Estanbol: istanbulsephardiccenter.com). Ya me ambezi ke la Komunidad Sefardi de Seattle es una de las mas importantes de los Estados Unidos. Entre los Sefardim de Seattle, vemos dos keilas/komunidades. La primera formada par los orijinarios de la Isla de Rodes, i la segunda formada por los ke vinieron de Rodosto-Tekirdağ i los ke vinieron de la Isla de Marmara. Esta emigrasyon empeso en los primeros anyos del 20en siglo. I reelmente es una komunidad unika. Todos los ke vinieron a esta sivdad guadraron todo lo ke trayeron kon eyos de las tierras Otomanas.

Los artikolos del livro fueron metidos al orden por Kerem Tınaz i Oscar Aguirre-Mandujano.

 El livro es formado de tres seksyones. La primera seksion es: La formasion de un arshivo kon la giadora de una komunitad. Los artikolos fueron eskritos por Devin E. Naar i Ty Alhadeff. La segunda seksion es: Meldar el pasado kon la Koleksion de las Bushkidades Sefaradi. Los artikolos fueron eskritos por Maureen Jackson, Laurent Mignon i Özgür Özkan. La tresera parte fue publikada kon el titolo: El pasado Otomano, Siertas Koleksiones Partikulares i Rekuerdos Familiales. Los artikolos fueron eskritos por Benjamen C. Fortna, Chris Gratien-Sam Negri, Kerem Tınaz i Hannah S. Pressman.

  Para formar estos arshivos, la koza la mas emportante fue el devuamyento del Doktor Devin Naar.

  Esto deve de ser un model para syertas komunitades ke konservan dainda sus egzistensias. Ya savemos ke munchos arshivos universitaryos de los Estados Unidos estan azyendo esforsos para merkar todo modo de livros i dokumentos ke tyenen relasiones kon las Komunitades Djudias Otomanas. I esto es un perikolo para muestras komunidades.

Siz de yorumunuzu yapın

Tüm Yorumları Görün