Sovre unos kuantos elementos de la Djudaika Otomana-Turka

Silvyo OVADYA Judeo-Espanyol
26 Mayıs 2021 Çarşamba

  Ya vos konti kreo unas kuantas vezes ke esto koleksyonando kartas postales sovre los Djudios Otomanos i Turkos. Kreo ke tengo la koleksiyon la mas ancha. I kada vez ke merko una karta esto dizyendo ke no va topar mas una karta sovre la Djudaika Otomana-Turka. Kreo ke tengo 3 kartas ke konosko i no pude toparlas i merkarlas durante estos vente o ventisinko anyos dalkavos. Ma la semana pasada en una vendida aviya una karta sovre Emin Pasha. Su nombre de orijin era Doktor Isaac Eduard Schnitzer. Era orijinario de una famiya Djudia de Prusia i nasyo en el kazal de Oppeln. Estudio la medisina en su payis i kon la medisina  reusho a ambezarse sovre la zoolojia, la botanika i la etnografia. Despues ke eskapo sus estudios en 1864  dyo karar de irse a la Albania para ser mediko en el Imperio Otomano. En poko tyempo se ambezo el Albanezo, el Turko, el Grego, el Italiano i el Serbo-Kroata. Despues ke se izo muzulmano, tomo el nombre de Prusyalı Emin Paşa i sirvio en el Servisyo de Enformasyones. Despues Emin Pasha se izo el doktor personal i el tresladador de İsmail Hakkı Paşa, governador de la Albania. Kuando Hakkı Paşa fue egzilado a Trabzon i el se fue kon el i avrio una klinik de mediko kon el nombre de Hayrullah Hekim i aya fue muy  famozo. Durante su vida en Trabzon se fue unas kuantas vezes a Estambol para ke Hakkı Paşa sea liberado i reusho. En 1872, kuando Hakkı Paşa fue nominado governador de Yanina, Emin Pasha se fue kon el para tener el posto de Prezidente de los medikos de la provensya de Yanina (Hekimbaşı). Despues de la muerte de Hakkı Paşa en el 1875 se fue a Ejipto i empeso a lavorar en la kapitala de Sudan en Hartum. Despues se fue a la punta del Imperio Otomano a Hattıistivâ ande Gordon Paşa era el governador. I desparte de los echos de sanedad izo bushkedades sovre las bestias (zoolojia) i las flores (botanika) i estas todas sensyas tomaron lugar en los rejistros de sensya.

   Emin Pasha a la fin fue nomado Governador de Hattıistivâ. I fue muy reushido. En 1889, kuando no reusho mas a tomar ayudo de Ejipto empeso a lavorar kon los Alemanes i organizo a ke syertos paizes sean koloniyas de la Alemanya. I lucho kontra el komersyo de los esklavos pretos. I su fin fue kon esto. El fue matado por los komersantes arabos de esklavos en el 1892 en el Kongo.

   Ya se save ke Emin Pasha kon su saviduria en la botanika, en la zoolojia i la etnografia mos desho muncha savidurya kon su konosensya.

Siz de yorumunuzu yapın

Tüm Yorumları Görün