SHAVUOT

Şeli GAON Judeo-Espanyol Sesli Dinle
26 Mayıs 2021 Çarşamba

          Shavuot en la lingua ebraika  sinyifika semanas. Despues de la sigunda noche de Pesah, el sinkuenten dia es la fyesta de Shavuot.

            Shavuot se selebra el sesh del mez de Sivan. Esta data es la rekolta de los produktos muevos de esta sezon. I este modo el puevlo de Israel yevava el primer rekolto al Beth-Amikdash. En este dia santo se dyo los dyez komandamyentos en el monte de Sinay; i esto es una djura del puevlo ke van a konformarsen a estas reglas.

           Shavuot es una fyesta muy grande. A la salida del Ejipto, el Dyo Baruhu mos salvo del esklavaje. Ma dainda no eramos un puevlo kompleto. El buto de la Tora ke fue dada en el  monte de Sinay, era de formar un puevlo ke tyene sus leyes i sus derechos.

            Las ijikas vistidas de novya en las sinagogas sembolizan; el kazamyento de los djudyos kon la Tora ke fue dada en Shavuot. Kerer byen la Tora es la proklamasyon del amor. Kuando mos aserkamos de la Tora deshamos todo modo de sentimyentos i penseryos de detras, i mos damos i mos konsakramos enteramente a la Tora.

            En esta fyesta alegre se kome dulsuryas de leche. La leche mantyene la persona, es el alimento prensipal del puerpo de la persona i la Tora es el alimento moral, espiritual de muestra alma.

            Mi madre me konta ke Shavuot en los anyos 1943-1947 se fyestava en la eskola Ben Shemen en Israel kon muncha felisidad. Kada elevo sus sestos en los ombros kon los produktos muevos de la primavera kantavan i baylavan en la guerta de la eskola ornada de rozas, frutas i los produktos muevos.

            En Shavuot se aze orasyones spesyales para fyestar komo un festival. La primera fyesta de este festival es Pesah, la sigunda Shavuot i la tresera es Sukot.

Kada djudyo, sea ombre, mujer u kriyatura deve de asistir a las orasyones en esta fyesta emportante para oyir los dyez komandamyentos de la Tora porke esto es la baza de la ley djudiya.

            En Shavuot se dekora las kazas, las sinagogas i mizmo las Sefer Toras. Este uzo semboliza el lugar de los djudyos ke estavan asperando la Tora en el monte Sinay, estava yeno de vedruras, i de rozas golyendo al miskle.

            Dyo kijo ke esta fyesta se selebre aryento de las ermozuras, kon alegriya i felisidad.

            El Dyo ke mos ayege para kada anyo kon todos djustos en muestro entorno, i kon pas i amor en el mundo, sin korona, sin gerra, i kon sanedad. Amen…

Siz de yorumunuzu yapın

Tüm Yorumları Görün