VIZAS POR VIDA “Visas for Life”

CHIUNE SUGIHARA (1900 – 1986)

Süzet FRANSEZ Judeo-Espanyol
11 Şubat 2021 Perşembe

Durante La Segunda Gerra mundial, en 1939, avia un diplomat japonez, Chiune Sugihara, ke era viskonsul del imperio Japonez en Kaunas, Lituania. Komo el avlava el ruso, el devia de dar informasion de intelijensia al Japon, sovre las armadas sovietikas i alemanas en la rejion baltika.

La Evropa estava devastada por la gerra i avia un grande problem de refujiados. En 1940, munchos judios se estavan arekojiendo en el konsolato japonez de Kaunas para obtener vizas de tranzito. Estas vizas permetian el viaje al Japon. Estos refujiados judios, primero devian de tomar el treno, Trans-Siberia. Este viaje era de Kaunas fista Vladivostok. Segundo, devian pasar la mar japoneza i akostar al porte de Tsuraga i despues a Kobe i Yokohama. El buto era de pasar el Oseano Pasifiko, para yegar a los Estados Unidos o al Canada.

Viendo la gravidad de la situasion de la gerra i de los refujiados, Chiune Sugihara desidio de dar vizas de tranzito, sin asperar la aprobasion del Japon. Estas vizas eran “visas for life”. Entre julio i fin de ogusto 1940, en la lista ofisial del konsolato japonez avia 2.140 nombres. Komo avia muy poko tiempo para la salvasion, Sugihara, korajozo i umanisto, desidio de dar vizas a los refujiados ke no tenian bastantes dokumentos. Dizen ke, el salvo a miles de personas.

El konsolato jeneral de Vladivostok, Nei Saburo, lavoro duro para ke los refujiados puedan partir verso el Japon. De kada vapor ke akostava al porte de Tsuraga, salian mas de 300 refujiados. El puevlo lokal los resivia kon ospitalidad i les ofresian mansanas.

En 1985, poko antes de su muerte, el Holokost Memorial de Israel, Yad Vashem, onoro a Chiune Sugihara kon el titolo de “djusto entre las nasiones”, por su ayudo a los refujiados de Lituania i le organizaron una seremonia en Jeruzalem. En 2000, el Ministerio del Eksterior del Japon, establesio una plaka komemorativa, en onor de Sugihara por sus aktos umanitarios, ke es ekspozado en  los Arshivos Diplomatikos asta oy.

En estos dias de la komemorasion de la Shoa, lo saludo kon respekto del fondo de mi korason.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR