Diya Internasyonal del Ladino 2021

Silvyo OVADYA Judeo-Espanyol
2 Aralık 2020 Çarşamba

   En enverano estavamos mas repozados kon esta Corona i no pensimos muncho lo ke deviamos de azer. Es djusto ke no pudimos realizar mismo un konsyerto de las Estreyikas d’Estambol en un lugar kompletamente avyerto, ma las personas estavan mas liberos en estos mezes, spesialmente en las Adas. Ya savesh ke kada anyo organizamos el Diya Internasyonal del Ladino de preferensia en muestra eskola i los dos anyos dalkavo kaji kon 400 personas. Asperimos fina oy, fin de novembre, ma vemos ke malgrado ke ya toparon diferentes vaksinas kontra este Covid, dainda tenemos de bivir buen karar de tyempo para tornar al normal. En la Ingletierra, payis riko, van a empesar despues del 10 de desembre a vaksinar todos los sivdadinos. Merkaron 50 milyones de dozes del vaksino. En el empesijo, el primer ministro Johnson estava pensando diferente ma despues ke se izo hazino empeso a pensar para la salud del puevlo. Serraron los restoranes, despues avriyeron los kafes, son dechizyones muy difisiles. En primero deves de ser riko para suportar todo lo ke deves de pagar a las kompanyias komersiales i a los sivdadinos i despues deves de dar karar. La fin del anyo es reelmente muy emportante por los payizes de majorita kristiana. “El Christmas” es muy emportante para el puevlo. Estan dizyendo ke los kafes, restoranes i los bistros azen un echo muy importante el mez de desembre. Los Espanyoles, Fransezes i Inglezes ay un syerto tyempo ke avian serrado estos lugares i tuvyeron buenos resultados. Agora empesaron a avrir. Ya se ke los Espanyoles avriyeron bastantes lugares. Los Inglezes van a avrir los restoranes oy. Mizmo en mi echo de tekstil, los Espanyoles i los Inglezes empesaron a dar muevas komandas porke estan avriyendo los magazenes.

   Esto kere dizir ke mizmo si empesan en unas kuantas semanas a vaksinar la djente, en Turkiya kon el vaksino Chinezo ke merkaron en grande kuantitad, los ladinoavlantes o los sempatizanos de la Kultura Sefardi no van a pueder vinir al Diya Internasyonal del Ladino.

   Dimos karar de azer esta aktivitad muy emportante para muestro Sentro en Zoom. Kreyo ke lo vamos azer kon 300 personas. Ya penso ke va ser bastante. Ya savesh lo ke vamos a ganar. Los ke keren sintir esta lingua 3 oras enteras van a pueder segir el program de las kuatro parets del mundo. Vamos a azer esta organizasyon el 7 de Febrero 2021. Diya de Alhad. Ma no  es muy fasil de dar karar para las oras. Mi opinion es ke 3 oras va ser bastante para esta aktivitad. Los “Enkontros de Alhad” se estan realizando a las 19.00. Ma si les demandamos una segunda vez pueden empesar a las 20.00. I devemos de eskapar a las 19.30. Vamos a empesar tres oras antes a las 16.30. Kuando la ora es 16.30 en Estanbol es 15.30 en Israel, 14.30 en las sivdades de la Evropa i 13.30 en la Ingletierra. Kuando vinimos a las Amerikas, Ardjentina, Chile i Brasil 10.30 de la demanyana, 8.30 en Nueva York i malorozamente 7.30 en Dallas i Meksiko. No va eskrivir la ora de Siatli porke va ser verso la manyana.

   Ke vamos a presentar. Kreo ke no vamos a tener problemes para presentar tres oras enteras kantes, parodias, skeches, teatros i prezentasyones en esta lingua. Karen va empesar en unos kuantos diyas a repartir rolos i doveres a muestros amigos.

   Espero ke esto no va ser el empesijo del muevo sistem komo el lavoro. Ya savemos ke en munchos ofisios oy en diya empesaron a lavorar en kazas. Eyos puedeser no tyenen menester de estar en kontakto. Ma mozotros keremos avlar, keremos tokar, keremos amar, keremos abrasar,  keremos bezar… Lo vamos azer en el 2022…

Despues ke eskrivi este artikolo Karen me telefono i me disho “Ke adjile preta ke tenias; tenemos una reunyon el 2 de desembre sovre el DIDL." Le dishe, no es importante, si trokamos de karar este artikolo va ser un artikolo ke no fue reushido...

 

Siz de yorumunuzu yapın

Tüm Yorumları Görün